Coronavirus: European League lian-te engtin nge an awm?

Covid-19 hri leng hlauhawm takin a luhkhung zingah infiamna khawvel chu a tuar na ber pawl an ni a, a bik takin Mizote ngaihven football-ah nghawng a nei na hle. 

European football-te chu an chawl ṭhuap a, league langsar tak tak te pawhin an kal zel dan tur an hrethiam thei meuh rih lo - mi tam tak thinlunga zawhna awm chu, "Engtikah nge football kan en leh ang?" tih hi a ni a, a chhanna pe theitu an awm rih lo. 

German football-a league sang ber Bundesliga-a club ṭhenkhat chuan kar hmasa khan training an nei ṭan leh der tawh a, Covid-19 vanga inkhelh chawlhsan a nih hnua Europe-a training nei leh hmasa ber an ni. 

Bayern Munich chu training ṭan leh tawh club zingah an tel a, hetihruala hriat tel tur erawh 'training an nei' tih hian a fimkhur thei ang berin kalpui a ni a, ṭum danga training an neih angin tih a ni lo. 

Player-te hian taksa insi loin ball an in pass kual a, shooting an zir a, invenna a ṭha thei ang bera kalpui a ni bawk. Bundesliga hi March 13 aṭanga chawl ṭanin ruahman ang chuan April 30 thlenga chawlh tura tih a ni.

Germany-ah hian tun hnaiah coronavirus-in ziaawm lam panin kai thar pawh an awm meuh lo a, hma an sawn zel - amaherawhchu German sorkar chuan August 31 thleng mipui punkhawm an khap chhunzawm a, May-ah league an khel ṭan leh a nih pawhin entu awm loa an khelh chhunzawm mai a rinawm hle.

Spanish league sang ber La Liga president Javier Tebas chuan May 28 velah chuan league an khelh chhunzawm leh theih tawh a beisei thu a sawi a, May-ah hian an thei lo a nih chuan June 6 emaw June 28 chu an tin zawn a ni bawk. 

La Liga hi khelh chhunzawm thei lo ta se club-te sum hloh tur zat hi euro tluklehdingawn khat a tling turah Tebas chuan a ngai a, Spanish top flight football-ah hian round 11 khelh tur a la awm. 

Covid-19 in a nghawng nat ber pawl Spain hian March 23 khan state of emergency an puang a, April 26-a hei hi hlih a nih hma chuan La Liga club-ten training an nei thei rih lo ang.

Spain pawh hi Covid-19 kai thar an tlem ve zel niin a lang a, mahse tarlan tawh angin he hriin a run nat ber pawl ram a nih avangin May-ah hian bul an ṭan thei lo a nih pawhin thil mak a ni lo. 

French sports chanchinbu lar L’Equipe chuan football lama thuneitute chuan June 3 emaw 17-a league khelh chhunzawm an tin zawn niin a tarlang a, mahse a hautak dawn. 

June 17-ah hian league khel ṭan ta se, July 25-a league zo hman turin club tin hian ni thum danah match an khelh a ngai dawn - August 2-a relegation leh promotion play-off khelh zawh hman tur nen hisap tel a ngai. 

Europe-a Covid-19 vanga thi tam lama pathumna France hian May 11 thleng chu lockdown (inkharkhip) an hmang rih dawn a, L'Equipe tarlan danin Ligue de Football Professionnel chuan August 23-a league khelh zawh hun sawn turin rawtna an nei. 

Mahse, he rawtna hi France Football Federation-in an la pawm ve leh tur a ni dawn a ni - France football hian French Cup final-a Paris St-Germain leh St Etienne intawn hun tur chu June 27-ah an sawn fel tawh a, League Cup final-a PSG leh Lyon intawn hun tur chu July 11 tih a ni bawk. 

Italian Football Federation (IFF) chuan league khelh zawh ngei an tum a, hemi tur hian May thlatirah player-te chu league ṭan a nih hmain coronavirus an kai leh kai loh test neih tir vek an tum.

March 9 aṭang khan Italian top flight football hi khelh a ni tawh lo a, an khelh leh hun tur hi hriatthiam a har hle - Europe-a coronavirus-in a nghawng nat ber pawl ram hian May 3 thleng chu lockdown an hmang dawn. 

IFF president Gabriele Gravina chuan, "Hri leng dinhmun a ziaawm hunah inelna chu khelh zawh kan tum ang, a ni tak sawi theih a ni lo a, mahse inelna khelh zawh ngei erawh kan duh a ni," a ti.

Serie A club ṭhenkhat zingah hlauthawng erawh an awm a,  Brescia president Massimo Cellino chuan league chu khelh chhunzawm a nih chuan an club chuan inhnuhdawh mai an hnial loh thu a sawi tawh - a hlau hi a awm a, chutihrual chuan Brescia hi Serie A mawngphah luahtu an ni tih hriat tel a ṭha. 

March 13 aṭanga khelh tawh loh Premier League chu khelh zawh ngei tura ruahmanna kalpui a ni a, Zirtawpni zana club inhmukhawmte chuan a khelh leh hun tur tak sawi lo mah se khelh zawh ngei an duh thu an sawi thung. 

English top flight football club ṭhenkhat chuan Zirtawpnia an inhmuhkhawmah hian league khelh leh hun tur tak hi sawi ho an beisei a, mahse a hun lam sawi loin khelh zawh ngei ṭha tiin thutlukna an siam ta thung. 

Premier League chuan, "League khelh zawh ngei ṭha kan ti a, khelh ṭan leh hun tur erawh tuna ngaihtuah chi niin kan hre rih lo," an ti a, a hun an la ngaihtuah lo. 

Players ṭhenkhat contract hi June-a tawp tur a awm nual a, June pela league khelh a nih chuan hei hi Premier League club ṭhenkhat buaina tur a ni ang.