Arsenal player-in hlawh la tlem dawn
Premier League club zingah Arsenal player-te chu Covid-19 vanga hlawh ti tlem hmasa ber an ni dawn, club leh player an inrem tawh - an inrem dan chuan Champions League khel tura an tling a nih chuan a hlawmin an la let thung ang.
Gunners player hian an hlawh 12.5%-in an la kim dawn lo, an hlawh lak kim loh tur zawng hi season thara UCL an khel phak a nih chuan an la let vek dawn tho a ni.
North London club neitu ten European football inelna sang ber khelh an duh takzet a, an hlawh lak kim loh pek leh vek bakah player tin chu bonus atan £500,000 (Rs nuai 95) pek tel vek an tum bawk.
Coronavirus vangin EPL chu chawlh lailawk a ni, an chawlh hma khan Gunners hi pakuana an ni mek - league hi khel chhunzawm pawh ni se match 10 chiah khelh tur an nei tawh; UCL khelh phak hi thil awlsam a ni dawn lo.
Arsenal hian an inbiakna hmasaah UCL an khel phak lo a nih chuan an hlawh 12.5% ti hniam turin an ti a, mahse player lamin an duh lo; tunah chuan manager Mikel Arteta hmalaknain ruahmanna siam danglamin inremna an siam thei ta zawk a ni.
Gunners executive team chuan kum khat (thla 12) chhung an hlawh tihhniam an lo remti tawh bawk, hri leng vang hian English club ṭhenkhat pawhin an hlawh an la tihniam zel tura ngaih a ni bawk.