Thailand an ṭha em?

FIFA ranking-ah India hi 127-na ni mekin, friendly match-a an hmachhawn tur Thailand hi 99-na an ni thung. Mahse, ranking aṭang ngawta teh a rem lo a, an intawn hnuhnung pahnihah India an chak ve ve.

Kum 2019 khan AFC Asian Cup-ah Blue Tigers hian 4-1 in Thailand hi an sawp a, Jeje Lalpekhlua'n goal mawi bik a khung nghe nghe. Hemi kum vekah hian Kings Cup-ah India hian 1-0 in Thailand an hneh a, bronze medal an hlawh chhuak - mahse, kum nga chuang a liam leh tawh.

Thai captain, kum 31 mi attacking midfielder Chanathip Songkrasin hi Asia khawmualpuia league ṭha pawl, J League lama season sarih zet lo khel tawh a ni a, India tana harsatna thlen turin a ṭha tawk.

Kum 24 mi Ben Davis hi Fulham academy aṭanga inzir chhuak niin, League One club Oxford United tan a lo khel tawh bawk. Winger leh attacking midfielder anga khel kawp thei player hi May 28-a Manchester United nena friendly match khel ASEAN All-Stars-ah khan a tel.

Kha inkhela goalkeeper Patiwat Khammai kha Thailand international tho a ni bawk a, 1-0 in United hi an hneh. J League lama khel Ekanit Panya pawh en bik tur zinga mi a ni a, mahni muala India hneh turin Thailand an ṭha tawk.