Federer dah sangtu Djokovic
Novak Djokovic chuan instagram live-a neihnaah Roger Federer a ngaihsan thu a sawi a, Federer leh Rafael Nadal a hmachhawn a nih chuan mipui ṭan hlawh nih a beisei ngai loh thu a sawi bawk.
Grand Slam vawi 20 champion tawh Federer hi mipui ṭan rawn a ni, a bik takin Wimbledon-ah phei chuan player dangte nen huang khata dah chi pawh a ni lo hial.
World number 2 Nadal pawhin fans a ngah, Spanish tlangval hi French Open-ah chuan midang chunga leng a ni. Federer leh Nadal te hi an thiam bakah an nungchang ṭhat vanga ṭan hlawh an ni.
Serbian tlangval Djokovic chuan, "Roger hi tennis player piang tawh zinga ropui ber a ni tih chu inhnial buai ngai loa thil chiangsa a ni. A nun phung leh awm dan vang hian khawvel pumah ṭan a hlawh a, thil nih dan tur dik tak a ni bawk.
"Roger Federer leh Rafael Nadal te hi chu tennis player an ni satliah lo a, midang tana entawn tur leh mihring ṭha tak an ni. An lakah hian player dangten ṭawngkam mawi lo leh nungchang ṭha lo an lan chhuahtir pawhin an thungrul ve ngai lo," a ti.
World number 1 Djokovic hi an ramah a awm mek a, hri leng vanga Serbia ram chhunga harsatna tawkte a ṭanpui tawh bakah, Italy hnenah sum ṭhahnem tak chu ṭanpui nan a theh chhuak tawh bawk.
Tennis season hi Covid-19 vangin an chawl lailawk mek a, clay leh grass court season chu an hmang thei dawn lo. French Open erawh May thlaa khelh tur ni mah se September thla tawp lam atana an sawn avangin khelh theih ngei an la beisei.