Sarri-a'n Chelsea player nen an inkar a sawi

Italian manager hian Stamford Bridge-ah 2018-19 season a hmang a, season khat lek hnuah Juventus a pan. Blues tan hian Europa League nomawi a chawi hman tho a, an elpui Arsenal chu final-ah an hneh.

Napoli manager hlui hi London-a a hun hnuhnung lamah lawm a hlawh lutuk lo, player ṭhenkhat nen an inkar a ṭhat loh bakah club thuneitu lakah pawh a tla tlum vak lo. 

Goalkeeper Kepa Arrizabalaga chu Sarri nena chanchin duhawm lo nei langsar tak a ni. Manchester City nen EFL Cup final an khelh ṭumin Sarri-a'n Kepa hi thlak a tum a, mahse a chhuak duh lo.

Juventus manager Sarri chuan, "Inelna a san a, player an len bawk chuan boruak ṭha siam thei nih a pawimawh a, chumi tak chu a harsa lai a ni si. Player chauh a ni lo a, a chhehvela thil awm zawng zawng nen inrem taka awm tur chuan hun pawh kan mamawh ṭhin.

"Chelsea-ah khan inhmuh thiam tawk lohna kan nei a, a tir lam thla ruk chhung vel kha chu a harsa hle. Mahse Europa League nomawi kan chawi meuh kha chuan lawm avangin biangah mittui a luang leh si," tiin a sawi.

Kum 61 mi Sarri hian tun season aṭangin Juventus a enkawl a, Turin club hi Serie A hmahruaitu an nih bakah Champions League last 16 an lut tawh bawk. An chesual viau a nih loh chuan league nomawi an chawi leh ngei hmel.

England-a hun a hman lai chungchang sawiin Sarri chuan, "Premier League kha ka ngai ṭhin, inelna a hautakin thil ngaihtuah kim a ngai hle. Kawng hrang hrangin kan inbei ṭhin a, club kan intiattawk bakah kan ṭha rual bawk.

"Player naupang zawkten English football-ah khan hmun an chang hnem a, entawn tlak ka ti hle. Italian football-ah pawh hian hmabak nei eng ten khelhna hmun chang hnem se ka duh," tiin a sawi.