Huang khatah Zlatan, Messi leh Ronaldo - Mancini
Roberto Mancini chuan Zlatan Ibrahimovic chu footballer ropui berte zinga mi a ni tih a sawi a, Swede striker hi Lionel Messi leh Cristiano Ronaldo te nen huang khata awm an nih thu a sawi bawk.
Messi leh Ronaldo te hian record ropui an insiam chhawk a ni deuh ber a, mimal chawimawina sang pawh an in hum haw chhawk - season hman laiah pawh a chungnungah awm lehin an team chu La Liga leh Serie A hmahruaitu an nihpui ve ve.
Zlatan hi tunah chuan kum 38 mi a ni tawh, vanglai a hmang zo tawh. Amaherawhchu, Italian club AC Milan tan a la khel phak a, a ṭuan fum deuh tawh mah se goal hmaah chuan a la hlauhawm reng.
Italy coach Mancini chuan, "Zlatan hi khawvel player ropui berte zingah hriatreng a ni tawh dawn. Kei chuan Messi leh Ronaldo te nen huang khatah ka dah, a kalna lam apiangah nomawi a chawi a, goal a khung ṭeuh zel bawk.
"Tunah pawh Milan tan ṭha takin a la khel thei, a hma hun atan eng nge a ruahmanna chu ka hre lo, chiang taka ka sawi theih erawh chawl mai loin ṭha takin a la inkhel chhunzawm ang," a ti.
6ft 5in striker Ibra hian club hrang hrang tana a goal khung belhkhawm chu 478 zet a ni a, league nomawi chauh pawh 13 ngawt a chawi tawh. A vanglai chuan Serie A player ṭha ber atan vawi thum thlan a lo ni tawh.