Grand Slam ngai pawimawhtu Halep
Simona Halep chuan Covid-19 hneha tennis a khelh leh theih hunah chuan Grand Slam a ngaih pawimawh tur thu a sawi, tennis season chawlh lailawk hi engtik hunah nge an khelh chhunzawm theih dawn tih erawh hriat a la ni lo.
Romanian nula Halep hian nikuma Wimbledon title a lak chu nakkum thleng a kawl thei dawn. Grass court inelna lian hi hripui leng mek vangin kuminah chuan an khel thei dawn lo a ni.
Kum 28 mi Halep chuan, "Engkim a ṭha vek a, tennis khel turin khawi hmunah pawh a zin kual leh theih tawh, tih an sawi hun ka nghakhlel hle. Inkhel thei loa awm hi a hrehawm a, ina taksa sawizawi ringawt chu a ṭhat rualin a kim lo hle.
"Nakinah chuan harsatna nei loin tennis kan la khel leh thei ngei ang a, chutih hunah chuan major tournament ka ngai pawimawh zual bik ang," a ti.
World number 2 Halep hi French Open leh Wimbledon-ah a champion tawh a, inelna lian dang Australian Open-ah final lut tawh mah se nomawi a la chawi lo; US Open-ah chuan a thlen san ber chu 2015 semifinal kha a ni.
Romanian star chuan sawi zawmin, "Tennis a khelh theih loh chuan player-te chu engmah lo mai kan ni a, kan hlu lo hle. Kan tan chuan court chhunga inkhelh theih aia hlu a awm lo.
"ATP leh WTA lamin khelh theih hun an siam thuai turah ngai ila, tournament kan khelh theih huna kan hlim tlan theih nan tunah chuan mahni awmhmun ṭheuha him taka awm a pawimawh," a ti.