AFI-in September an tinzawn
Athletics Federation of India (AFI) chuan ram chhunga inelna neih leh theih hun tur tak an la sawi chiang thei lo a, tuna an beisei dan chuan September thlaah inelna neih theih an inring - thutlukna chiang tak erawh an la siam lo.
AFI president Adille Sumariwala chuan, "Tokyo Olympic neih hun tur khum khata tih tlai a nih avangin kan infiammite chuan inbuatsaihna hun thawl deuh an neih belh tura ngaih a ni, hei hian result ṭha a neih ngei pawh ka ring.
"Kan tum dan chuan September thla aṭangin inelna neih leh theih kan tum a, nakkum March-April thleng vel kan nei chhunzawm ang. Ram pawn lama inelna chu kan sawi phak a awm lo, kan ram chhungah erawh boruak ṭha leh eng lam zel kan neih theih a beiseiawm," a ti.
India infiammi tam tak chu Olympic atan an tling chiang tawh a, ṭhenkhat erawhin qualifier khelh hmabak an la nei. Infiammi ṭhenkhat - Neeraj Chopra, Shivpal Singh, quarter-miler Hima Das, shot putter Tajinder Toor, race walker KT Irfan leh 4x400m relay team-te chuan national training camp an zawm tawh.