Barca chak nan Messi

Manchester City sawp hlim Barcelona-in Valencia laka hnehna chang turin injury time-a Lionel Messi penalty an mamawh a, khualmualah 3-2 in hnehna an chang hram. Messi hian minute 22-naah goal hmahruai a khung a, Argentina captain goal khung lai hian Luis Suarez chu a offside ngei niin lang mah se goal-ah pawm a ni a, goal dang lut loin chawlhlawk an hmang.

Second half-ah Valencia-in goal hnihin an chhang let a, Barca aṭanga loan-a Valencia pantu Munir el Haddadi chuan a club dik tak zawk lamah goal a khung a, Rodrigo chuan goal hnihna a belhchhah ve leh bawk. Catalan club tan Luis Suarez-a'n an si phurh a sut hnuah goal dang lut lawk lo mah se Uruguayan striker hian inkury time-ah Aymen Abdennour-a'n a tih tluk vangin penalty a hlawh chhuak a, chakna goal ni turin Messi-a'n a khung.

MessiMessi penalty

Valencia goalkeeper Diego Alves-a hming chherna chu penalty dan theihah a ni. Kum 31-a upa keeper hian penalty a hmachhawn hnuhnung 35-ah vawi 17 zet chu a dan sak! Brazilian keeper hmachhawn turin Messi a pen chhuak a, penalty pet goal loh khut ching forward ropui hian timna leh zamna nei miah loin a khung - Messi-a'n Valencia a hmachhawn vawi 21-ah goal 19 zet a khung ta.

Iniesta-a inhliam

Barcelona-in point thum hlu tak hlawh chhuak mah se an lawm a kim lo. Club captain Andres Iniesta chu minute 14-naa Valencia midfielder Enzo Perez tackle hlauhawm tak avangin a inhliam a, Spanish midfielder hi kar ruk aṭanga kar riat vel tal a chawlh a ngai dawn. Spanish midfielder hian Champions League group stage match thum khelh tur la awmah a hmel a lan thei tawh lo ang.

Enrique thukhawchang

Barcelona coach Luis Enrique chuan, "Kan chak dan khan he team rilru puthmang leh nihphung a pholang a, hliam vanga Iniesta kan chan hnuah pawh khan hnual miah loin
ṭha takin kan khelh chhunzawm thei a ni. He team hian hnehna chang turin inrintawkna kan nei a, kan point neih saa belh zel hi kan tum chu a ni. Player hliam nei miah loin kheltluan thei ila kan duh a, mah se kan thil tawn kha kan team boruak ṭha tak pholangtu a ni si," a ti.

Neymar contract

Catalan club-in Valencia an lenchilh hma hian chanchin lawmawm an nei a, hun rei tak chhung contract thar a ziah loh avanga Paris Saint Germain zawm tur ang hiala an sawi Neymar chuan contract thar a ziak. Kum 24-a upa forward hian Nou Camp-ah kum 2021 thleng hun hmang turin contract a ziak a, Brazil captain hi lei chhuak duh an awm a nih chuan a man zat hi pound maktaduai 222 thlenga sang chho thei tura tih niin kum khatah pound mak-taduai 15 bawr vel a hlawh ang.