Juventus hnehtu Milan an phur

Serie A champion Juventus chu kum li hnua a vawi khat nan league match bikah AC Milan lakah 1-0 in an tlawm. Milan hian point 19 hmuin table-ah pahnihna an ni a, hmahruaitu Juve nen an inthlauhna chu point hnih chiah a ni.

Inrinni zan San Siro-a inkhela goal awmchhun hi minute 65-naa rawlthar duhawm Manuel Locatelli-a khung a ni. Kum 18-a upa Locatelli hi tun season-ah Milan senior team-ah a inlan ṭan a, Italian midfielder hian league match kua a khelh tawhah goal hnih a khung ta.

Massimiliano Allegri naute hian Miralem Pjanic hmangin goal khat khung ve mah se offside vangin pawm sak an ni lo a, German midfielder Sami Khedira goal khung tur chu kum 17-a upa Milan goalkeeper Gianluigi Donnarumma-a'n ropui takin a dan sak bawk.

A zawna season nga chhung league nomawi chawi tawh Juve hian season bul an ṭan fuh tawk lo a, match kua khelh tawh aṭangin vawi hnih an chak lohna a ni. Hetihlai hian Italian champion vawi 18 ni tawh Milan erawhin an match hnuhnung parukah vawi nga hnehna an chang a, ṭum khat an inhnehtawk thung. Season nga chhung zet table laihawl team ni ṭhin Milan hian kum 2011 hnua a vawi khat nan Serie A nomawi an beisei leh mek - European champion vawi sarih an nih tawhna a lang chhuak leh ṭan ta.

AC Milan coach Vincenzo Montella chuan, "Juve lakah goal khung chunga kan goal kan venghim thei kha a ropui hle. Team boruak ṭha tak kan nei a, player ten inrintawkna nen nuamti taka an khelh chuan result ṭha hi chu a lo kal mai, kan khelh ṭhat hi kan chhunzawm zel theih ka beisei," tiin a sawi.

Juve manager Allegri chuan, "Pjanic goal an pawm lo kha mak ka ti, Milan player-te khan referee kha thutlukna dik siam thei lo khawpin an zar buai a ni," tiin an chak loh chhanah referee Nicola Rizzol thutlukna chu dik loah a puh.

Italian manager chuan sawi chhunzawmin, "First half chhung khan Milan khan kan goal-ah vawi khat chiah an pet thei, chutihrualin Locatelli-a goal erawh a ropui hle thung. Football-ah chuan nitin zirlai thar a awm a, kan tho leh nghal ang," a ti.

Inrinni zan inkhel dangah Sampdoria chuan forward Luis Muriel leh defender Armando Izzo ten an lama a tih luh hmangin an mikhual Genoa chu 2-1 in an hneh.

Sampdoria hian he inkhelah hian August thla a Italy-a lirnghing vanga mi 298 thite tan a bikin jersey an ha a, inkhel enman aṭanga an sum hmuh zatve pawh chhiattawkte tan an hlan dawn a ni.