Team huaisen Dortmund-in point an hmu

Borussia Dortmund-in FC Ingolstadt laka goal thum zet an chhuah chungin goal thum an khung ve bawk a, 3-3 a inhnehtawkin point khat hlu tak an hlawh chhuak. Inrinni zan Bundesliga inkhel dangah Bayern Munich chuan an mikhual Borussia Monchengladbach chu 2-0 in an hneh thung.

Goal a tam

Audi Sportpark-a inkhelah mualneitu Ingolstadt-in bul an ṭan ṭha zawk a, midfielder Almog Cohen leh forward Dario Lezcano te goal hmangin first half-ah 2-0 in hma an hruai.

Second half minute 59-naah Pierre-Emerick Aubameyang chuan an siphurh a sut ṭhen a, Gabonese international hian a goal khung a lawm zo hman ṭawk tihah Ingolstadt tan Lezcano-a'n he inkhela a goal hnihna a khung zui leh nghal. Thomas Tuchel-a naute an tlawm mai dawna a lan hnuah Christian Pulisic chuan hun pek belhah penalty aṭangin an si phurh a sut zo.

Dortmund hian Bundesliga match riat khelh tawh aṭangin point 14 an hmu a, table-ah parukna niin hmahruaitu Bayern nen point rukin an inthlau tawh.

Dortmund coach Tuchel chuan, "Inkhel bulṭan tirh aṭangin na taka nawr kan tum a, chu chu minute 90 chhungin kan ti thei lo. Kan beisei loh result kan neih avangin kan lungngai hle," tiin an chak zo lo chu na an tih thu a zep lo. Tuchel hian Champions League khela an zin chhuah hnuah league match khel zui tura an taksa a inpeih hman loh thu a sawi tel bawk.

Bayern chak awlsam

Champion lai leh hmahruaitu ni bawk Bayern Munich chuan Arturo Vidal leh Douglas Costa te goal hmangin Borussia Mon-chengladbach 2-0 in an hneh a, Carlo Ancelotti naute hian point 20 hmuin an hmahruaina an sawh nghet zel.

Allianz Arena-a inkhel an ni bawka Ancelotti-a'n captain Philipp Lahm a hahchawlhtir a, senior player Arjen Robben-a'n khelmual chhungah hotu nih a tlin hle. Dutch winger hian an goal khatna luh theih nan a thawhhlawk bakah Bayern goal nawr tam zawk chu amah aṭanga chhuak a ni.

Kum 32-a upa Robben hian hliam vangin season bul a ṭan thei lo a, a dam hnuah Bayern tan match thum khel tawhin kar hmasaa Eintracht Frankfurt nen an inhnehtawk ṭumin goal a khung - Champions League-a PSV an hneh ṭumin a ṭhiante goal khung tur vawi hnih a siam sak bawk.

Bayern manager Ancelotti chuan, "Kan khel ṭha takzet, goal kan khung bakah kan goal kan venghim tluan thei khan mi ti hlim hle. Ka naute rilru puthmang a dik a, an huaisen bakah hnehna chan duhna thinlung an nei," a ti. Bayern hian an khingpui goal lamah vawi 17 zet an pet theih laiin goalkeeper Manuel Neuer-a'n minute 90 chhungin hna a nei miah lo.

Pathumna Hoffenheim

Inkhel dangah Lammuala Mizoram team nena inkhel tawh Hoffenheim chuan Bayer Leverkusen 3-0 in an sawp. Inkhel ṭan aṭanga minute rukna lekah Leverkusen forward Kevin Volland hnawhchhuah a ni a, player tam zawk Hoffenheim tan Kerem Demirbay, Sandro Wagner leh Steven Zuber ten goal khungin nuamsa takin point thum an hmu - match riat khelh aṭanga point 16 hmuin table-ah pathumnaah an invawrh chho.