MPL hun a inher chhuak leh ta. Hmun ruak 1 : Chanmari W nge Ramhlun N? Chanmari hmaah Zo United thar
September 27 khan Lam-mualah Chanmari West FC-in captain Laldampuia goal hnih hmangin Ramhlun North 2-0 in an hneh a, vawiin tlai dar 3:00 hian West Warrior leh MPL kaithar Ramhlun North te Mizoram Pemier League Season 5-a a vawi hnih nan an intawng leh dawn.
HC Zarzoliana kaihhruai West Warrior-in point 13 hmu tawhin pathumnaah an awm a, Lalruatliana Sailo (Tawia) hoten point sarih hmu tawhin Chanmari West nena an inthlauhna hi point ruk (match hnih) chauh a ni.
Hmun ruak 1
Vanglaini chanchinbuin inkhel hmasa zawk a thlir lawknaah, "Ramhlun North emaw Chanmari West emaw tan semifinal-ah hmunruak pakhat chiah a awm.
Cham-pion lai Aizawl FC player neih dan te, Chanmari FC leh Bethlehem VT point hmuh tawh dante bakah Chhinga Veng player lakluh dan thlirin season tawpah club pahnih tan semifinal-ah hmun ruak siam-sak an nih a rin-awm loh," tiin a ziak.
Club pahnih in-tawn hmasak ṭum kha Round 5 a ni a, tunah thil awm dan danglam deuh tawh mah se club pahnih tan hian semifinal-ah hmunruak pakhat chauh a la awm thoah a ngaih theih.
Hei erawh hriat a ṭha - Chanmari West-in Chhangphut Field-ah champion lai Aizawl FC an hneh thei a, Ramhlun North-in anmahni ang bawka MPL kaithar Chhinga Veng FC an hneh bawk. Champhaia point thum hlu tak an hlawhchhuah hnuin Lammualah a vawi hnih nan an intawng ang.
Transfer leh Hremna
Chanmari West FC-in squad tihchak nan Chanmari FC aṭangin Reuben Zo-sangpuia an lalut. MPL2 best midfielder Reuben hian a club tharah match fitness nei tur khawpin a khelh tam a rinawm a, physical fitness lamah hma a sawn bawk chuan West Warrior chuan an ṭhat pui khawp ang.
Ramhlun North FC-in Chanmari FC aṭang thoin Isaac Lalruatpuia an lalut a, first division club Venghlui FC aṭangin striker Lalremruata an lalut bawk. Ramhlun North-in field sir lamah player tlan chak an mamawh belha Isaac hi mamawh chhanna a ni thei ang. Tawia team-ah goal khung thei striker tan hmun ruak a awm bawk a, Remruata an lalut thei hi an vannei hle a ni.
Amaherawhchu Ram-hlun North forward MC Malsawmzuala chu Aizawl FC laka chet mawi loh vang-in match thum an hrem a, Chhinga Veng nena hnawhchhuah defender Lalmalsawma a inlan thei dawn lo. MPL kaithar tana thu lawmawm chu defender Lalruatfela chu chhawr theih turin a dam tawh.
Engtin zel?
Chanmari West coach HC Zarzoliana chuan, "Semifinal kan la lut lo, table thlir ila tumah kan la inthlau lo.Vawi hnih chet sual leh chet ṭhat hian awmzia thui tak a nei a ni. Point hmuh belh zel tumin theihtawp chhuahin kan bei ang," tiin an dinhmun a la
ṭhat loh thu a sawi.
West Warrior tan Dampuia'n goal nga a khung tawh a, vawiin pawh hian Kawrtethawveng tlangval leh goal thum khung tawh Danmawia te an pawimawh leh ang.
Ramhlun North coach Lalruatliana Sailo chuan, "Chanmari West hian an coach ruahmanna anga an khel thei a nih chuan khelh an harsa dawn, anni hi team khauh tak an ni. Chutihrualin ka player-te rilru put hmang a dik chho ṭan leh tawh a, hma lam pan turin kan inpeih khawp mai. Match khat result-in table a thlak danglam zel avangin match tin hi a pawimawh a ni," tiin Vanglaini palai a hrilh.
MPL kaithar hian Cham-phaiah pawh ṭantu an nei ṭha a, Lammualah Chhangphut Field a anmahni ṭantu aia tam an pungkhawm leh tawh ang. Hemi hun chiah hi West Warrior ṭantute tan fiahna a ni thei dawn a, Chanmari West hian an result hmangin mipui an au khawm mek.
Zo United-in Mizoram Premier League Season 5 khelh mekah point sarih hmuin panganaah an awm a, champion ngei tumin coaching staff an thlak. Coach thar Remlalthlamuanpuia (Sabito) kaihhruaina hnuai-ah Zo United-in zanin dar 7:00 hian Chanmari FC an hmachhawn dawn a, Thawh-
ṭanni zanah football hmuh-nawm thlir tur a awm dawn e.
Coach thar a hlui
Zo United-in Vanlalrova tlak nan season liam taa semifinal luhna kawnga mi pawimawh Remlalthlamuanpuia an lalut a, Sabito tiha hriat lar zawk coach hian Aizawl DFA Second Division-ah a club enkawl lai SL Sailo EFC chu season opening tournament-ah a champion pui. Sabito pui tur hian Zosangliana chu manager atana lakluh a ni a, James Khamliansawma'n technical director hna a chelh ang.
Coach thar an lakluh hian nghawng lian tak a nei nghal a, hmahruaitu ni mek Bethlehem Vengthlang FC-in Malsawmtluanga leh Laldinliana Varte te an lalut tawh mai tura ngaih chu tlawlh. Zo United president Lal-
ṭanpuia chuan, "Champion kan la tum avangin kan player pahnih hi BVT lamah kan chhuah lo ang," tiin Vanglaini palai hnehah thutlukna an siam tawh thu a sawi.
An inthuam ṭha
Zo United-in first divi-sion club Chaltlang FC aṭang-in an player hlui Malsawm-dawngliana an la let a, Far-kawn tlangval hi winger ni bawk mah se forward-ah pawh chhawr theih tura ngaih a ni. Tun season-ah Zo United hian Lammualah goal khat chiah an khung a, an goal hnih dang hi Chhangphut Field-ah an khung. Tuna an mamawh chu goal khung thei player a ni a, Lalnunsanga (Tale-a) thlawptu an mamawh.
MPL club-ten foreigner an melh nasa a, Zo United hi lalut lo tura ngaih ni zet mah se an bang tawh bik lo. Club neitu ṬP-a chuan, "Tuna kan player-te khelh dan hi kan thlir ang a, kan result a zirin a ṭul a nih chuan foreigner pawh kan melh leh ang," tiin Vanglaini palai a hrilh.
Zo United-in tlarhnung an la ngai pawimawh reng a, goalkeeper thar Lalvenhima an lakluh bakah India junior camp-a awm tawh Chaltlang Lily Veng rawlthar Joel an laltu bawk.
Semifinal an thlir
Chanmari FC-in Chhang-phut Field-ah MPL hmahruaitu Bethlehem Vengthlang an nuai a, MPL2 champion hian semifinal an thlir tawhah a ngaih theih.
Lalsangzuala Hmar kaihhruai team hian foreigner pahnih an lalut thuai dawn a, an dawr fel tawha ngaih a ni. Hemi atana squad tih thawl nan hian an hman tam loh player Reuben Zosangpuia leh Isaac Lalruatpuia te chu club dangah an chhuahtir thung.
Point 14 hmu tawh Chan-mari FC hian semifinal lut turin point tam an mamawh tawh lo tih chu a chiang a, chutihrualin zanina an khingpui tur Zo United nen hian an intawn hmasak zawk ṭumin an inhnehtawk. Sanga hote hian zaninah point an hmu lo a nih chuan ngaih ṭha taka an awm a thiang lo ang.
Chanmari FC coach Lal-sang-zuala Hmar chuan, "Semifinal hi kan la ngaihtuah lo. Zo United laka kan khelh dan tur chiah kan ngaihtuah a, phase 1 lama kan draw tawh a nih avangin kan fimkhur hle a ṭul a ni," tiin league round an la ngaih pawimawh thu a sawi thung.
Team Dinhmun
# Team Pld W D L GF GA GD Pts
1 Bethlehem VT 7 5 1 1 8 5 3 16
2 Chanmari FC 7 4 2 1 14 6 8 14
3 Chanmari West 7 4 1 2 10 5 5 13
4 Aizawl FC 7 3 1 3 7 5 2 10
5 Zo United 7 1 4 2 3 6 -3 7
6 Ramhlun North 7 2 1 4 6 10 -4 7
7 Chhinga Veng 7 1 2 4 9 13 -4 5
8 Dinthar FC 7 0 4 3 6 13 -7 4