Wenger leh Arsenal an chelh

Arsene Wenger-a kum 67 tlin niah Arsenal chu an mikhual Middlesbrough nen 0-0 in an inhnehtawk. Gunners hian February thla hnu lama a vawi khat nan Emirates Stadium-a league match an khelhah goal an khung lo.

Arsenal-in league match ruka hnehna an chan zawn hnuah Boro lakah point khat chauh hmu mah se league hmahruaitu an ni tho a, nizan lama inkhel Manchester City result a zirin an dinhmun a danglam ang.

Gunners chungnung nghal mah se Boro-in goal venhim tawp an ngaihtuah avangin Alexis Sanchez, Mesut Ozil leh Theo Walcott te danin an awm a; Boro keeper Victor Valdes a rim hle. London club-in Granit Xhaka awm loh a tuar a, Middlesbrough coach Aitor Karanka-a'n counter attack hmanga vuak let dan tur ṭha tak a duan avangin Petr Cech-a'n Wenger hote a chhanhim angin a sawi theih tho bawk. Veteran keeper Cech hian Gaston Ramirez, Adama Traore leh Alvaro Negredo te goal khung tur a dan sak.

Arsenal boss Wenger chuan, "Ball possession 75% nei chungin a chak loh theih, tlarhmaah kan hriam tawk lo a nih chuan hnehna a chan theih loh," a ti. Arsenal hian hliam vangin Olivier Giroud an la chhawr thei lo a, hun tawp dawn lama rawn tlan lut Lucas Perez lah a ti kimtu mai a ni.

French manager Wenger hian Manchester City (1-0, 2005) leh Reading (4-0, 2006) te a hneh a, a pianchama league match vawi thum a khelhnaah erawh a chak zo lo.