Klopp-a hoin Reds an vul

Jurgen Klopp-a hnuaia Liver­pool an hmuhnawm chhun­zawm zel - Inrinni zan khan Reds hian hneh taka inkhel thunun chungin West Brom chu 2-1 in an hneh. Anfield-a inkhelah Liverpool-in goal khung turin hun an duh rei lo a, minute 20-naah Sadio Mane chuan Roberto Firmino siam sak goal-a chantir turin harsatna a nei lo. Senegalese forward hian Philippe Coutinho goal khung tur a siam sak chhunzawm ve lehnghal a, minute 81-naa Baggies defender Gareth McAuley goal khung chu Reds hmingṭha lutuk tur hliahna pakhat ve mai chauh a ni.

Adam Lallana chuan a hun
ṭha neih bar chunga thlawh nan a hmang a, goalkeeper Ben Foster chuan Dejan Lovren leh Firmino te goal khung tur dan sak turin a hnathawh tur dik tak a thawk bawk. Reds-in inelna hrang hrangah match kua chhung ngam loh an tawng ta lo a, tun season Premier League-ah goal 20 zet an khung tawh bawk - a league match hnuhnung pasariha goal khung thei lo, bench lama hun hmang Daniel Sturridge an mamawh rih lo. Reds hian Baggies lakah hian goal shot 21 zet neiin 68% ball an chang bawk.

Klopp-a thukhawchang

Liverpool manager Jurgen Klopp chuan, "West Brom hi team ṭha tak an nih avangin ka naute khelh danah ka lawm a ni. Awihawm loh khawpa ṭha a kan khelh avangin chak zo lo ngat ila chu a nuihzatthlak duh ngawt ang. Baggies khan engemaw tal hlawhchhuah tumin min rawn pan a, mah se hlawh­chhamin kan hawtir a ni," tiin a naute khelh danah a lawm hle.

Foxes an kal zel

Leicester City chuan Premier League champion zia chhuahin an mikhual Crystal Palace chu 3-1 in an hneh a, league-a an home match hnuhnung 20-ah tlawm hmel an hmu ta lo - Foxes tan Ahmed Musa chuan club tana a goal hmasa ber a khung a, Shinji Okazaki-a'n goal khat dang a belhchhaah ve hnuah Christian Fuchs chuan volley ropui hmangin a khung ve leh bawk. Palace tan Yohan Cabaye-a goal-in awmzia a nei thui lo.

Champions League match thum an khelh tawha hnehna la chang vek Leicester boss Claudio Ranieri chuan, "Tun season-a kan khelh ṭhat ber ṭum ni hialin ka hria a, season hmasaa kan khelh dan kha minti hre chhuak a ni," a ti. Italian manager hian a match hnuhnung pariata goal khung lo Jamie Vardy chu bul a ṭantir lo a, Champions League khelh chauh vanga hahchawlhtir a nih thu a sawi.

Spurs an chelh

Tottenham Hotspur chuan Bournemouth khelmualah goal an khung theih loh avangin an mikhualna ramah point khat bak an hlawh chhuak zo lo. Cherries tan Charlie Daniels-a shot chu Spurs keeper Hugo Lloris-a'n ṭha takin a dan sak a, Erik Lamela-a'n crossbar a pet per hnuah mualneitu keeper Artur Boruc chuan Dele Alli leh Danny Rose te a ti beidawng bawk.

Mualneitu team-in referee Craig Pawson chungah lungawi lohna tur an nei a, Moussa Sissoko-a'n Harry Arter a nghawk luih vanga a yellow card pahnihna a hmu lo te, Jan Vertonghen-a'n Jack Wilshers a tih tluk vanga Spurs-in penalty an chawi lo te chu an sawi rei ve ngawt ang. Tottenham manager Mauricio Pochettino chuan, "Nomawi chawi kan duh chuan hetiang ang game-a chak tur hi kan ni," tiin a naute khelh danah a lawm lo hle.

Everton chuan rin loh takin khualmualah Burnley an ngam lo a, 2-1 in an tlawm. Mualneitu team tan Sam Vokes-a'n goal hmahruai a khung hnuah Yannick Bolasie chuan Merseyside club tan an si phurh sut mah se minute 90-naah Arfield chuan Burnley tan chakna goal a khung a ni.