Conte lakah Mourinho a zawr

Jose Mourinho-a'n khawvela player manto ber Paul Pogba hruai chungin Stamford Bridge a pan a, pound maktaduai 89 man midfielder leh 'The Special One' te hi Antonio Conte-a enkawl Chelsea chuan 4-0 in an lo sawp. Italian manager lakah chuan heng mi lian pahnihte hi player naran leh manager satliah mai an ni.

Pathianni zan Premier League inkhel dangah Pep Guardiola naute chu an mangchhia aṭangin an la harh chhuak thei lo, an mikhual Southampton nen 1-1 in an inhnehtawk. City hian point 20 hmuin league hmahruaitu ni mah se an hnuaia awm Arsenal leh Liverpool te nen an point a inzat.

Second 30 chauh!

Chelsea forward Pedro-a'n tun season Premier League-a goal rang ber ni turin second 30-na lekah goal hmahruai a khung nghal, Barcelona star hlui hian United defender Chris Smalling leh Daley Blind te mawi taka a tlan hel hnuah David de Gea dan hman lohin a tlawh lut.

Khelmual chhunga United player 11 ten ball an khawih fuh ve hauh hmain Blues lamin goal khat an nei der tawh! Goal khat an khung aṭangin Chelsea an phur zuala, Gary Cahill (21), Eden Hazard (62) leh N'Golo Kante (70) ten a khat mawi tawkin goal an khung zawm a - United erawh minute 90 chhungin tho leh tur khawpin an khel chhuak thei lo.

Mi pangngai

Manager ṭawngduh ve tak Mourinho-a'n a hming lem atan 'The Special One' a invuah hnuah amah sawi nan hman chhunzawm a ni a, tun hma lama Porto, Chelsea, Inter Milan leh Real Madrid te a lo hlawhtlin pui tawh dan thlirin a awm lo hran lo. Mahse, Portuguese manager hi kum 2015 December thla khan Blues manager a nihna aṭangin ban a ni, hetih hunlai hian a team chu league table-ah 16-na a nih pui!

Inkhel ṭan hmain Mourinho hian Chelsea fan-te chuan engtiangin nge an lo dawnsawn dawn a hriat loh thu a sawi, nomawi pakua chawipui tawhtu an manager hi an lo dawngsawng ṭha hle. Goal li phur chunga khelmual a chhuahsan tur erawh Blues fans hian 'Mi pangngai mai i ni' tiin an au thung!

Amaherawhchu, Mourinho hian Stamford Bridge-a a kir lehna hmasa berah hian club hrang hrang a enkawl tawh aṭanga a chak loh chian ber dawt ṭum a tawng - Real Madrid a enkawl lai kum 2010 November thla khan Barcelona lakah 5-0 in a lo tlawm tawh. Hei mai bakah hian United tan kum 2011 October a Manchester City 6-1 a an hneh loh hnua Premier League-a an chak loh chian leh ber ṭum a ni.

Anfield-a goal ven thiam khan Chelsea lakah an tlarhnung phui an chhawm zui thei lo a, captain Wayne Rooney tel loa khel striker Zlatan Ibrahimovic chu a kum a tam tawh tih phat rual a ni lo a, rawlthar duhawm Marcus Rashford lah inkhel boruak sangah a la patuai hle tih a chiang bawk.

Conte tak tak

Juventus leh Italy a enkawl laiin Conte hi goal ven thiam tia sawi ṭhin a ni. Chelsea a enkawl hnuah Mourinho kalphung hmasa a chhawm a, defender pali a tlar ṭhin - thla hmasa khan an elpui Liverpool leh Arsenal an hneh loh avangin sawisel a hlawh.

Captain John Terry a in-hliam a, Italian manager hian duh-thlan tur dang a neih tawh miau loh avangin tun hma lama a lo hlawhtlinpui tawh ṭhin angin defender pathum Cesar Azpilicueta, David Luiz leh Gary Cahill te a hmang a - Victor Moses leh Marcos Alonso Mendoza te a sir aṭangin an tlan let tam bawk.

Kum 47-a upa Conte kaihhruai Chelsea hian Arsenal an hneh loh hnuah a zawnin Hull City, Leicester City leh United an hneh tawh a, hengah hian goal an chhuah miah loh bakah goal kua ngawt an khung - Conte tak tak a inlar ṭan e.

Eng nge an sawi?

Chelsea manager Conte chuan, "Bul kan ṭha takzet a, a lawmawm zualna chu goal kan chhuah lo leh kan khel ṭha chhunzawm kha a ni. Hetianga hnehna chan hi chuan inrintawkna tam tak min pek belh ṭhin," tiin a sawi. Conte hian a naute a khelhtir dan chu ṭha a tih thu leh league-a palina nih mek chu a chhia a tih loh thu a sawi tel bawk.

Manchester United manager Mourinho chuan, "Kan chak lo a, point thum kan hloh avangin a lungchhiat thlak takzet. Kan tlarhnung a phui lo a nih chuan kan tuar tur reng pawh a ni. Tunah hian a sang pathum kan phak lohna chu point ruk lai a ni tawh a, hnehna chan kan mamawh - chutihrualin a awlsam lo ang," a ti.

City an buai zel?

Guardiola-a'n inkhelh ṭan hmaa a sawi ang ngeiin captain Vincent Kompany leh Sergio Aguero ten club-ah hma hun an la nei tih lantir nan inkhel bul a ṭantir. Defender Kompany leh a hote hi an hna pui ber goal venhim kawngah a hlawhtling tluan chhuak lo, Saints tan Nathan Redmond-a'n minute 27-naah goal a khung.

Barcelona laka bench-a a
ṭhut-tir Aguero pawh goal hmaah a hriam tawk lo, Argentina hian ball a hloh ngun bawk. John Stones-a goal pawm a nih loh hnua City goal neihchhun hi second half minute ngana lekah substitute Kelechi Iheanacho khung a ni. City hian a zawnin in-el-na hrang hrangah match nga chhung chak ni hmel an hmu ta lo.

Manchester City hian Saints goal zawnah vawi thum chiah an pet a, manager thar Guardiola hnuaia an khingpuite goal zawna an pet tlem ber ṭum a ni. Hetihlai hian Saints lam hian fak an phu thung, league match bikah a zawnin match nga chhung hneh loh an tawng tawh lo.

City manager Guardiola chuan, "First hlaf kha kan khel chhe hle a, tihsual kan nei kha a pawi a ni. Football khelh ka duh danah chuan kan khingpui striker ball kan pass tur a ni lo," tiin Stones a tihsual chungchang a sawi.

Saints manager Claude Puel chuan, "Europa League kan khelh aṭanga ni hnih hnu lekah hetianga kan khel chhuak thei hi a lawmawm, Etihad Stadium-a point kan hmuh theih avangin ka naute khelh danah ka lungawi," tiin a sawi.