James leh NBA kan nghak chhuak

National Basketball Association (NBA) season thar chu October 26, Nilaini zing dar 5:30 hian khelh ṭan a ni leh dawn ta. 2016-17 NBA season hi a vawi 71-na tur a ni dawn a, match hmasa ber atan champion lai LeBron James-a khelhna Cleveland Cavaliers chuan New York Knicks an lo mikhual ang.

Kumin December 25 hi Pathianni a nih dawn avangin 'Christmas Day Game' chu Pathianniah khelh a ni dawn a, nak-kum February 19 khian Smoothie King Center, New Orleans-ah 2017 NBA All-Star Game chu khelh tur a ni ang. April 12, 2017 hian regular season chu khelh zawh tura ruahman niin April 15, 2017 aṭangin playoff khelh a ni dawn - a hmawr bawk nan NBA Finals khelh a ni leh dawn bawk.

Kuminah hian team 30 an inel dawn a, Eastern Conference (15 teams) leh Western Conference (15 teams) ah te ṭhenhran niin regular season-ah chuan team tin hian match 82 ṭheuh an khel ang.

Regular season an khelh zawh hnu hian Conference pahniha point hmusang team pariat ve ve te chuan playoff an khel ang. Best of seven series hmangin Conference champion zawn a ni dawn a, hemi hnuah team
ṭha pahnih ten nomawi inchuh turin NBA Finals an khel dawn a ni.

Nikum regular season bika team ṭha bera chhal ngam Golden State War-riors hian Kevin Durant an lalut a, Most Valuable Player Stephen Curry bakah Klay Thompson leh Draymond Green te an la neih bawk avang-in tu tan mah tum an chakawm loh ang - anni hian Nilaini zing dar 8:00-ah San Antonio Spurs an lenchilh dawn.