EFL Cup A thiam pariat zinga tel tum Reds vs Spurs
Zanin dar 12:15-ah EFL Cup last 16 khelh ṭan a ni dawn a, inkhel tur zinga ngaihven hlawh ber chu Liverpool-in Tottenham Hotspur an mikhual tur hi a ni. Team pahnih intawn hnuhnung pathumah chak zawk awm loin an inṭhen a, zaninah erawh chak lo zawk awm a thiang dawn lo - attacking football khel ṭhin team pahnih inkhel tur hi a hmuhnawm dawn.
Inelna hrang hranga match kâw chhung tlawm hmel hmu tawh lo Liverpool hian Spurs an mikhual hma an league match hnuhnung berah West Brom chu harsatna nei loin 2-1 in an hneh a, Baggies boss Tony Pulis chuan, "Liverpool bench hi en ula, Premier League nomawi chawi turin an ṭha tawk," tiin a sawi a, an inhmachhawn hnuhnung pariata vawi nga hneh a, vawi thum an draw theih lakah Reds an inringtawk khawp ang.
Tottenham-in inelna hrang hranga an match khelh hnuhnung pariatah tlawm hmel hmu lo mah se an match hnuhnung pathumah an khingpui inhnehtawkpui vekin an match hnuhnung pahnihah phei chuan goal an khung lo! Bournemouth nen an inhnehtawk ṭumin coach Mauricio Pochettino chuan, "Premier League champion nih kan duh chuan Bournemouth laka chak tur kan ni," tiin a sawi a, league nomawi chawi duh club hian EFL pawh chawi an duh dawn avangin zaninah insiamṭhat an tum dawn.
Inlan tur
Liverpool-in October 29-ah league match khel turin Crystal Palace an lenchilh lehnghal dawn avangin game rang khelh-tir ṭhin Jurgen Klopp-a'n Baggies laka khel chau a naute a chawlh hah-damtir nual a rinawm. German coach hian bench lama hun hmang ṭhin player a hmang dawn a nih pawn Divock Origi, Simon Mignolet, Daniel Sturridge leh Lucas Leiva te an la nih nawk avangin Spurs hneh turin an ṭha tawk.
Reds Under 23-in Pathiannia Everton an hmachhawn ṭumin Danny Ings, Trent Alexander-Arnold, Marko Grujic, Ovie Ejaria leh Kevin Stewart te chawlhtir an ni a, rawlthar rual player hian Spurs lakah an hmel an lan a nih pawn a mak lo ang. Club captain Jordan Henderson erawh Baggies lakah tun season-a a yellow card pangana a chawi avangin match khat khel thei lo tura hrem a ni a, zaninah a inlan dawn lo chiang.
Spurs lamah Bournemouth hmachhawn turin Toby Alder-weireld dam hman mah se Belgian defender hi Pochettino-a'n hman loh a thlang zawk a, zaninah inkhel bul a ṭan a nih pawn a mak lo ang. Hliam vanga a inlan theih loh reng hnuah Harry Kane-a'n training a zawm leh tawh a, hliam dam hnua Liverpool hmachhawn nghal tur chuan English striker hi a la nem mah mahin a rinawm.
Arsenal inlan dawn
Premier League club langsar zingah Arsenal chuan Reading an mikhual dawn - Championship club hi Manchester United defen-der hlui Jaap Stam-a enkawl a ni. Gunners hian inelna hrang hrang--ah match 12 chhung chu tlawm hmel an hmu tawh lo a, an league match hnuhnung berah rin loh takin Middlesbrough chu goal khung loin an inhnehtawkpui thung.
Inkhelh zawhah Wenger chuan, "Champions League kan khelh chauh laiin Boro erawh inah TV aṭangin inkhel an en thei thung, kan chau a ni," tiin chhuanlam a siam a, an intawn hnuhnung pakuaa an la hneh vek Reading laka chhuanlam a siam a nih erawh chuan fan-ten an hrethiam lo tawp ang.
French manager Wenger-a'n EFLCup lamah player siksawi nual a chin avangin Premier Lea-gue lama hmun chang tam lo Lucas Perez, Alex Oxlade-Chamberlain leh David Ospina ten inkhel bul an ṭan beisei a ni a, hliam vanga rei tak a chawlh hnuah Olivier Giroud chu chhawr theih a nih thu Wenger chuan a sawi bawk. Gunners player zing-ah Granit Xhaka chuan a hremna a la hmang zo lo a, hliam vangin Santi Cazorla a la chawl bawk.