Real chak zanah Atletico an tlawm

Spanish La Liga inum bo-ruak a ngaihnawm chho zel - Pathianni zan khan Real Madrid chuan table chung ber luah turin an mikhual Athletic Bilbao chu 2-1 in an hneh hram a, Atletico Madrid erawh an mikhualna ramah Sevilla lakah 1-0 in an tlawm thung.

Santiago Bernabeu-a inkhel-ah Real-in goal an khung hma a, inkhel ṭan aṭanga minute sarihna lekah Karim Benzema chuan Isco siamsak chu an goal hmahruai ni turin a khung. Mahse Pepe leh Dani Carvajal ten Bilbao midfielder Javier Eraso ball chan an chhuhsak theih loh hnuah mikhual team tan Sabin Merino chuan an si phurh sutna goal a khung.

Real tan Cristiano Ronaldo-a'n hun ṭha vawi tam a khawhral hnuah substitute Alvaro Morata a inlar a, Juventus aṭanga Real lama kir leh striker hian a kum 24 tlin lawm nan minute 83-naah chakna goal a khung.

Khawiah nge Ronaldo?

Real Madrid tan Ronaldo-a'n beisei a phak lo tluan chhuak zak a, inkhelh chhung zawnga shot 11 neiin vawi hnih chiah target zawnah a pet thei - minute 90 chhunga a mimal goal shot zat hi inkhel pumpuia Athletico Bilbao shot zat 10 ai pawn a tam a, hetichung hian goal khungtu zingah a hming hmuh tur a awm lo.

Portugal captain hian tun hnaiah ngai a awh lo tih phat rual a ni lo a, league match a khelh tawh vawi sarihah goal hnih chiah a khung. Ronaldo hian first half-ah a chance vawi khat chu goalkeeper Gorka Iraizoz zawnah tak a pet a, mahni hmasial lo deuh nise chuan a sirah awlsam taka pek theih turin Karim Benzema leh Gareth Bale te an awm. Hei mai a la ni lo cheu, injury time-a Lucas Vazquez siamsak a khung loh pawh a theihna leh thiamna ngaihtuah chuan 'thil awm lo' tak a ni.

Zidane thukhawchang

Real Madrid coach Zinedine Zidane chuan, "Morata hian game tam zawk a la khel dawn a, mah se kan nghah peih ve a ngai a ni. Morata leh Lucas Vazquez te khan an khel ṭha takzet a, khelmuala tlan luhtir an nih tawh chuan beidawngin min awmtir ngai lo. Player pahnih hian inkhel bul an la
ṭan em em ang tih ka sawi duh a, mah se awlsam taka bul
ṭan tur erawhin beisei suh u," tiin a player duhawm pahnih chungchang a sawi.

Atletico an mualpho

Europa League champion Sevilla-in La Liga nomawi bei-sei ngam khawp an ni tih pholangin an mikhual Atletico Madrid chu 1-0 in an hneh a, he inkhela goal awmchhun hi minute 73-naa Steven N'Zonzi khung a ni. Hneh loh la tawng lo Atletico midfielder Koke chu goal an chhuah aṭanga minute li hnu lawkah a yellow card pahnihna avangin hnawhchhuah zui a ni a, Diego Simeone-a naute an tho tawh lo.

Atletico Madrid tan Angel Correa chuan goal khung ngei tur nia ngaihah a hun ṭha neih a khawhral a, Sevilla forward Vitolo volley ropui tak chu Atletico Madrid goalkeeper Jan Oblak chuan ropui takin a dang bawk. Atletico boss Diego Simeone chuan, "First half-ah khan game thlak danglamna hun kan nei a, mah se kan ti lo. Hun
ṭha kan neihah goal kan khung lo a, kan tuar a ni," tiin a naute khelh danah a lawm loh thu a sawi.