Marseille-in PSG an chelh

Manager thar Rudi Garcia enkawlna hnuaia an match hmasa berah Marseille chuan khualmualah Paris St-Germain chu goal awm loin an inhnehtawkpui.

American sumdawng hausa Frank McCourt-a'n Marseille a lei hnuah AS Roma boss hlui Garcia a lalut a, an match hmasa berah hian PSG goal zawnah vawi khat mah pet lo mah se an goal an venhim miau avangin point khat an hlawh chhuak. Tun season inelna hrang hranga goal 13 khung tawh PSG striker Edinson Cavani chu a penalty beisei pek a ni lo a, goal ruakah a khung ṭhelh bawk.

Inkhel dangah hmahruaitu Nice chuan forward Alassane Plea-a hattrick siam hmangin Metz 4-2 in an hneh. Nice hian French Ligue 1 match 10 khelh tawh aṭangin point 26 hmuin hma an hruai chhunzawm zel a, champion lai PSG chu point 20 hmuin league table-ah pathumna an ni mek thung.