Kum 3 hnuah Del Potro champion

Juan Martin Del Potro chuan a banrek na vanga kum thum dawn a inkhelh mumal loh hnuah ATP title a la ve leh ta. US Open champion hlui hian Pathianni zan khan Jack Sock chu 7-5, 6-1 a hnehin Stockholm Open champion nomawi a chawi.

Argentine tlangval Del Potro hian kum 2009 khan Rafael Nadal leh Roger Federer te hnehin US Open nomawi a chawi a, khawvel a barakhaih. A banrek na vangin a inkhel mumal thei lo zui a, kuminah lo kir lehin Rio Olympic-ah khan silver medal a vai chhuak. Hei bakah hian mipa tennis team inelna Davis Cup-ah Argentina chu final a hruai thleng a, thla leh hian Croatia an hmachhawn ang - final an luh theih nan hian semifinal-ah world number 2 Andy Murray a hneh nghe nghe.

World number 63 Del Potro chuan, "Hun rei tak ka inkhelh mumal theih tak loh avangin tun anga hma hian nomawi ka chawi theih hi ka beisei ngam lo. Ka champion thei hi ka lawm a, hei hian ka hma hunah beiseina min siamsak ngei ang," tiin a sawi. Kum 28-a upa Del Potro hian kum 2014 leh 2015 khan tournament paruk chiah a hmachhawn a ni.