Vawi 50 chak thei Hamilton

Pathianni zana tlan zawh tak United States Grand Prix-ah Lewis Hamilton-a'n hnehna a chang. Mercedes driver hian Formula 1 intlansiakah vawi 50 hnehna a channa chiah a ni a, a nomawi humhim turin beiseina a nei thar leh ta.

US-a intlansiakah hian Hamilton hian darkar khat leh minute 38 leh second 12.618 chhungin a thleng, July thla hnua pakhatna a nih lehna hmasa ber niin a teammate leh championship-a hmahruai mektu Nico Rosberg chu pahnihna a ni thung - Mercedes driver pahnihte inthlauhna hi point 26 chiah a ni ta, tun season-ah point 75 hmuh theih a la awm avangin champion tur a la chiang lo zel.

Kum 31-a upa Hamilton hi Formula 1 driver zingah hnehna chan tam lama pathumna a ni ta a, a tluk loh chu Alain Prost (51) leh Michael Schumacher (91) te chiah an ni a, kum 2008, 2014 leh 2015 te khan champion nomawi a lo chawi tawh.

US GP bika vawi nga hnehna chang tawh Hamilton chuan, "July thla hnua hnehna ka chan lehna hmasa ber a nih avangin he hun thleng tur hian ka nghak rei hle. Intlansiak hmabak pathum kan la nei a, thilthleng thei tam tak a la awm - tun hi inelna hautak hmachhawn tura inbuatsaih ngawrh a ngaih hun chu a ni," tiin a sawi.