India tan Kohli a vul

ODI series khelh mekah India chuan Pathianni khan wicket sarihin New Zealand an hneh a, run 154 siamtu Virat Kohli chu player langsar ber a ni. India leh New Zealand hian ODI match nga khelh turah match thum an khelhna a ni a, India hian vawi hnih hnehna chang tawhin series-ah 2-1 in hma an hruai mek. October 26-ah match lina an khel leh ang.

Punjab Cricket Asso-ciation Stadium, Mohali-a inkhelah New Zealand an bat hmasa zawk a, over 49.5-ah an vaia out vekin run 285 an siam. Run 61 siamtu Tom Latham chu run siam hnem ber niin Ross Taylor (44) leh Jimmy Neesham (57) ten an khel ṭha viau bawk. Indian bowler zingah over 10 vawma run 75 petu leh wicket thum latu Umesh Yadav a langsar a, over nga lek vawm chunga wicket thum la thei Kedar Jadhav chu Black Caps batsman te chhaih mangangtu a ni - over nga a vawmah hian run 29 chiah a pe bawk.

India-in hma takah opener Rohit Sharma (13) leh Ajinkya Rahane (5) chan mah se India-in Virat Kohli an nei a, kum 27-a upa batsman hian ball 134 a hmachhawnah run 154 vaw chhuakin a tawp thleng a dam. Kohli bakah India captain MS Dhoni chuan team kaihruaitu ṭha a nihzia a pholang bawk a, ball 91 a hmachhawnah run 80 a vaw chhuak thei. Dhoni out hnuah pawh run 28 siama a tawp thleng dam Manish Pandey a rawn chet ṭhat ve leh avangin India-in over 48.2-ah target an umpha der a, mi pathum chiah an hloh.