MPL-ah pawisain point a lei thei dawn em? Aizawl FC-in Chhinga Veng Field pawn leh chhungah an ngam!BVT hmaah Nigerian pahnih nei Dinthar

Vawiin tlai dar 3:00-ah I League club Aizawl FC-in MPL kai thar Chhinga Veng an hmachhawn dawn a, Lammuala an inkhelh tawhna leh field pawn lam boruak hriat chianin a hmuhnawm lehzual ang.

Shillong Lajong leh Royal Wahingdoh player hlui Lallawmzuala Chhakchhuak chu Aizawl FC-in an lalut a, Thingsai tlangval hi tun season ṭan hma khan Chhinga Veng FC-in an rim nasa hle. Lawma hian MPL kaithar hi a zawm mai dawna a lan laiin I League club Aizawl FC a pan ta zawk a, tawnhriat nei
ṭha defender hian Chhinga Veng a hmachhawn hmasa ber dawn.

K. Malsawmkima hoten September 26 khan coach thar Chawngthansanga hnuaia khel Chhinga Veng lakah goal chhuah hmasa mah se hun a tawp meuh chuan 2-1 in Aizawl FC an chak.

Khelmual chhungah I League club-in point thum an sual chhuak a, khelmual pawnah MPL kaitharin an hmin theih loh Lawma an la lut hmak bawk.

Kan nawr dawn - Mala

Aizawl FC coach Mala'n Vanglaini palai hnenah right back Lawma'n inkhel bul a ṭan nghal tur thu a sawi a, chumi awmzia chu defence laiah Lalramchullvoa leh Lalrinzuala Khiangte te an inkawp ang a, vei lamah Ricky Lallawmawma a awm dawn tihna a ni.

I League club hian Delhi Dynamos lakah Lalruatthara an chan a, Lawma hian tlarhnung a tikhawng sawt ang. Amaherawhchu coach Mala erawhin tlarhnung ngaihthah loin goal khung a ngaih pawimawh thu a sawi a, Aizawl FC boss chuan, "Phase 1-a kan fitness khan duhthu a sam lo. Tunah erawh ka player-te chevel a hmuhnawm em em a, kan goal nawr pawh a na tawh khawp ang. Chak leh chak loh hi chu kan sawi theih bak a ni a, chutihrualin point thum hmu tur leh goal khung tur chuan kan thawkrim a ni," tiin a naute chu inkhel tura an inpeih tawh thu a sawi.

Aizawl FC hian Ghanaian forward Bright Middleton Mends leh rawlthar forward Lalremsanga-te chu tlarhmaah an dah a rinawm a, beisei la pha lo Nigerian midfielder Benja-min Eniwo Onome erawhin inkhel bul a ṭan hmel loh.

Hei le, Chhinga Veng

Chhinga Veng FC-in MPL khelh ve taka him ringawt tum chu a fuh lo tiin sum sengin champion an tum a, match sariha an point hlawhchhuah chu point nga lek a ni.

Coach thar Chawnga hnuaia an match thum khelh tawhah point an la hmu lo a, semifinal thlen an tum a nih chuan Aizawl FC lakah hian point an hmuh hrim hrim a ṭul.

Chhinga Veng coach Chawng-a chuan, "Resi-dential camp kan nei a, practice match kan neih aṭanga tehin kan hlawkpuiin ka hria. Phase 1 aiin kan ṭha tawh zawk a, kan khingpui apiang hneh vek kan tum hi a ṭul a tawh a ni. Chutihrualin Aizawl FC hi Aizawl FC an la ni reng a, chak tum ve tho an ni," tiin ṭawng pawr thei an nih loh thu a sawi.

Chawnga hi Champhaia Ramhlun North an hneh loh
ṭuma a chet mawi loh avangin match thum an hrem a, vawiin tlai hian technical area-ah a ṭhu thei dawn lo. MPL kaithar tana thu lawmawm erawh defender Laldinliana a dam tawh a, Ronald Zothanzama a pawh a ṭul dan azira chhawr theih a ni.

Chhinga Veng hian Aizawl FC an hmachhawn hmasak zawk ṭuma an chhawr loh Emma Chigozie an hmang thei dawn a, Nigerian defender hian a club hlui tlarhmate dan chah a tum dawn.

Hei chauh hi a ni lo, MFA Super Cup-a AFC harsatna thlentu Bungkawn FC midfielder Joseph Biakthianghlima'n MPL kaithar a zawm a, Bungkawn tlangval hian I League club a hmachhawn dawn.

Aizawl FC hian point 10 an hmu tawh a, Chhinga Veng hian I League club hmuh chanve chauh la hmu mah se vawiina point thum kalna zawk azirin team pahnih hmalam hun a danglam ang.

Veng lian pahnih. Football tupui pahnih. Football thiam veng pahnih. fans nei ṭha ve ve. Zanin hian Lammualah an intawng dawn.

Dinthar an indinthar a, zanin dar 7:00-a Bethlehem Vengthlang FC nena an inkhel tur hi a hmuhnawm ang. MPL5 hmahruaitu BVT hmachhawn turin Dinthar-in foreigner thar pahnih an luhtir dawn - a boruak a lian tawh hle!

Dinthar an ni tlat!

Mizoram club hlun Dinthar FC-in an tih ṭhin dan angin tualchhung football an tingaihnawm leh ta. MPL1 champion-in foreigner pahnih - defender Balogun Hammed leh midfielder Clarence Carter Ezebube te an ziak lut.

Hei bakah hian an veng defender ṭha ṭhin Lalnunsanga (Sangsanga) leh Champhai keeper Joseph C Lalruatfela an ziak lut bawk.

Dinthar FC hian November 3-a Zo United an hmachhawn hunah chuan Cho Tsering Lepcha an chhawr hman an beisei bawk a, MPL champion hmasa ber hian hneh la nei lo mah se Aizawl FC tiamin club pali an draw theih avangin an inlak ṭhat hma pawh hian 'point box' chu an ni bik lo hrim hrim.

Dinthar FC coach Lalhlupuia Sailo chuan, "A hma ai chuan kan ṭha tawh zawk. Inpuahchahna hun ṭha kan nei a, kan dinhmun thlirin point thum hmu tura kan beih a ṭul a ni," a ti a, Nigerian player pahnih ten inkhel bul an ṭan tur thu a sawi bawk.

Defender Hammed hi feet nga leh inches 10-a sang niin Shillong league-ah te pawh lo khel tawh ṭhin a ni a, midfielder Clarence Carter Ezebube hi Kashmir leh Assam league-ah te a khel tawh
ṭhin. Carter hian English club Sheffield Wednesday in India ram an rawn tlawh ṭumin Assam XI tana khelin a lo hmachhawn tawh bawk.

Dinthar tana thu lawmawm chu Aizawl FC aṭanga an lakluh Michael Lalremruata'n goal khung a thiam tih a lantir leh ṭan tawh a, Chhangphut Field-a Zo United nen an inhnehtawk ṭumin Michael-a hian goal ṭha bik pahnih a khung.

BVT an zam lo

Bethlehem VT coach Lalbiaksanga Colney chuan, "Dinthar FC-in foreigner pahnih an lak avang hian kan buai phah lo. Tun hi Dinthar hmachhawn hun tak pawh a ni zawkin ka hria, tunah hi chuan an duhthusamin inpuahchahna hun an la nei lo. Team ṭha tak an ni dawn tih chu ka hria a, Phase 1 ang thoin Dinthar nena kan inkhel turah hian point thum hlawhchhuah kan tum ang," tiin semifinal ticket neih vat an duh thu a sawi.

BVT hian MPL1-a Dinthar champion pui tawhtu Lalnunmawia (Mawitea) an lalut a, Ramhlun South tlangval hian a club hlui lamah BVT tana competitive match hmasa ber a khel dawn.

BS-a chuan sawi chhunzawmin, "Kan beisei angin transfer a kaltluang lo a, Mawitea chiah kan la lakluh avangin kan squad a chhah tawk lo. Chutihrualin inhliam kan neih loh chuan eng team pawh kan elpha a, tun hi inhliam kan neih loh lai a ni," tiin inkhel turin a inpeih tawh hle.

BVT chakna chu tlarhnung a ni a, defence laia Lalhlimpuia leh Laldinpuia te inkawp chu MPL5-a inkawp fuh ber ang hiala chhal theih an ni.

Intawnna hmasa

BVT-in September 26-a Dinthar FC an hneh ṭumin Lalmawizuala leh Apuia goal hmangin point thum an hlawh chhuak a, he match hi Lalhlua hnuaia Dinthar FC-in match hnih an khelhna chiah a ni.

Dinthar boss Lalhlua chuan, "Kan intawn hmasak zawk kha chuan inpuahchahna hun pawh ka nei rei lo a, tunah erawh kar khat chuang kan inpuahchah ve tawh," tiin BVT laka tlawm nawn a tum loh thu a sawi.

MPL champion hmasa berin an club history-a a vawi khat nan foreigner an chhawr ve dawn ta a, Maimawms ṭhahnem takin an rawn ṭawiawm ang.

Bethlehem VT lamin coach thar hnuaia phur thar mek Dinthar FC hi hneh an tum a nih chuan field pawn lama an tlem bik a thiang lo .