West Warrior-in semifinal an hnaih
Nimin tlai inkhel hmuhnawm takah Chanmari West FC-in Ramhlun North FC 3-2 in an hneh a, West Warrior hian point 16 hmuin Mizoram Premier League Season 5 hmahruaitu Bethlehem Vengthlang FC chu head to head-ah chiah an tluk lo.
Nizan khan Chanmari FC leh Zo United an inkhel a, result a zirin table a la danglam thei ang.
Chanmari West FC tan Lalmuanzuala'n goal hnih a khung a, Lengpui tlangval goal khung karah hian captain Laldampuia'n tun MPL5-a a goal ngana a khung bawk.
Ramhlun North-in Chanmari FC aṭanga an lakluh Isaac Lalruatpuia hmanga an hmahruai hnuah goal thum an chhuah a, hun tawpah player 10-a khel chungin player thar Lalremruata hmanga an goal khungna chuan result a thlak danglam thei lo.
Damna thlentu Dampuia
West Warrior captain Dampuia'n an si phurh an sut theih nana a corner pet ṭha tak chu Muanzuala'n a tauh goal a, Kawrtethawveng tlangval hian first half tawp hmain goal theihna tur pawha lang lo aṭangin a pet kual lut.
Chanmari West tan Reuben Zosangpuia'n inkhel bul a ṭan a, second half-a lut PC Lalawmpuia (Tuaitea) pawhin thiam thil a nei tih a pholang a, Mohun Bagan striker hlui erawh a la thawhrim deuh a ṭul ang.
Player 10 leh vanduaina
Ramhlun North winger David Lalrinchhana'n first half-ah chance ṭha bik a hlah a, second half-ah Zosangliana'n (Chhaia) crossbar a pet per a, Lalmuanawma ball tauh chu keeper zawnah chiah a kal a, B. Malsawmzuala a vannei tawk lo bawk.
MPL kaithar vanduaina belhchhah turin Lalramthlamuana pass sual chu Muanzuala ke zawnah a kal a, Lengpui forward hian Chanmari West goal thumna a khung phah bakah Ramhlun North keeper David Lalrinpuia inhliam zuiin player 10-a an khelh a ṭul phah.
West Warrior talbuai zarah Ramhlun North-in beiseina thar nei mah se MPL kaitharin tihsual an ngah avangin khel ṭha zawk chungin an chak lo.
Engtin zel?
Ramhlun North coach Lalruatliana Sailo chuan, "Kan la inlak belh dawn. Match ruk khelh turah semifinal kawng a la inhawng," tiin foreigner an lak tur thu a sawi thawi bakah beiseina an la neih thu a sawi.
Chanmari West coach HC Zarzoliana chuan, "Kan khelṭha lo a, kan khelh danah lawmna tur a awm lo. Kan result erawh a lawmawm a, a rang thei ang bera kan insiamṭhat a ṭul a ni," tiin an khelh danah a lungawi loh thu a sawi.
Tute nge inlan?
Chanmari West FC (4-1-4-1): Lalruatpuia; Racy K. Lalremmawia, Toky Zomuanpuia, R. Lalawmpuia, Vanlalzuia Hnamte; Reuben Zosangpuia (K. Lalnunzama 64'); R. Laldanmawia, Lalmuanzuala, Lalmuansanga, Laldampuia; H. Lallianzama (PC Lalawmpuia 55')
Ramhlun North FC (4-2-3-1): David Lalrinpuia; Lalruatfela (John Lalduhawma 62'), C. Ramdinmawia, Lalramthlamuana, Lalmuanawma; Lalchhuanpuia (Lalremruata 46'), Lalruatkima Dosel; Isaac Lalruatpuia, Zosangliana Sailo, David Lalrinchhana (Jerry Zonunsanga 60'); B. Malsawmzuala
ZoFooty Statistics
Chanmari West FC 3 - 2 Ramhlun North
CWFC : Lalmuanzuala 16', 76'; Laldampuia 45'
RNFC : Isaac Lalruatpuia 10'; Lalremruata 90'
MoM : Ladampuia, CWFC
44% Ball Possession 56%
13 Shots 16
8 On Target 5
2 Yellow Cards 0
0 Red Cards 0
Powered By Rainbow Multibrand
Mobile Showroom
Team Dinhmun
# Team Pld W D L GF GA GD Pts
1 Bethlehem VT 7 5 1 1 8 5 3 16
2 Chanmari West 8 5 1 2 13 7 6 16
3 Chanmari FC 7 4 2 1 14 6 8 14
4 Aizawl FC 7 3 1 3 7 5 2 10
5 Zo United 7 1 4 2 3 6 -3 7
6 Ramhlun North 8 2 1 5 8 13 -5 7
7 Chhinga Veng 7 1 2 4 9 13 -4 5
8 Dinthar FC 7 0 4 3 6 13 -7 4