Goal nen Jeje a lo kir

Match hnih chhung Indian Super League-a hmuh tur a awm loh hnuah Jeje Lalpekhlua kan hmu leh ta a, Mizo tlangval hian goal ropui nen Chennaiyin FC coach Marco Materazzi tan inngaihtuah ṭhatna hun a pe. Pathianni zan khan Chennai club hian Pune City chu khualmualah an lenchilh a, 1-1 in an inhnehtawk.

Materazzi enkawl club tan Jeje-a'n minute 28-naah goal hmahruai a khung a, Hnahthial tlangval hian a tharum ngahna hmanga Equatorial Guinea international Eduardo Ferreira laka hmun awl a insiam hnuah Pune keeper Edel Bete tlan chhuak a hmu a, yard 30 vela hla aṭangin goal ropui a khung - striker naran tan khung chi a ni lo.

Hero of the Match-a thlan Jeje-a'n inkhel ṭantira Hans Mulder tana a siamsak ṭha tak chu Dutch midfielder hian goal-ah a chantir thei lo a, minute 79-naa Dudu Omagbemi tana hun remchang a siamsak chu Nigerian striker hian a chhawr thei lo bawk. South Indian club-in Jeje-a khelh ṭhat an chhawr ṭangkai loh an tuar a, minute 82-naah Pune tan Mexican striker Anibal Rodriguez chuan freekick aṭangin an si phurh sutna goal a khung a ni.

ISL match thum chauh la khel chunga assist vawi hnih neia goal khat khungtu Jeje chuan, "Italy lama pre-season kan neihnaah ka khupah hliam ka tuar a, match hmasa pahnih pawh kha hliam chungin ka khel lui a ni. Mahse, theihtawp chhuahin training-naah ka bei a, goal ka khung leh ta hi ka lawm khawp mai. Kan squad-a chhah avangin match tinah khel tur chiang sa a awm bik lo a, ka tan chuan a pawimawh ber chu team chak a ni," tiin a mimal hmingṭhatna aia team hlawhtlinaa a ngaihpawimawh zawk thu Vanglaini palai a hrilh.

Mizo left back Jerry Lalrinzuala chu inkhelah hian Winning pass of the match chawimawina pek a ni a, Bethlehem rawlthar chungchang sawi nghalin Jeje chuan, "Jerry hi a tirah chuan first team tan a khelh phak tuman kan ring lo. Mahse, Dhanachandra Singh inhliam chhawr ṭangkaiin hmun a chang a, tunah chuan coach rin ber zinga mi a ni tawh. Jerry hian he dinhmun luah tur hian a thawkrim a, training-naah pawh a hmuhnawm a, Indian left back ṭha ber ni turin theihna a nei a ni," tiin Bethlehem rawlthar chu a chhuang hle.

Mimal Lawmman

Winning Pass of the Match Jerry Lalrinzuala, Chennaiyin FC

ISL Emerging Player of the Match Narayan Das, Pune City

Hero the Match Jeje Lalpekhlua, Chennaiyin FC

Zanin Inkhel Tur

Atletico de Kolkata 07:00 PM Mumbai City