Zaninah dar 12:30-ah Manchester Derby

September 10 khan Pep Guardiola leh Jose Mourinho te Old Trafford-ah an intawng tawh a, hetih hunlai hian Manchester khaw club pahnihin hneh loh an la tawng lo. Spanish manager Pep-a kaihhruai City-in Kevin de Bruyne (15') leh Kelechi Iheanacho (36') te goal hmangin an ṭhenawm United 2-1 in an hneh a, Red Devils tan Zlatan Ibrahimovic-a'n minute 42-naah City keeper thar Claudio Bravo tihsual zarah a khung ve bawk.

Zanin hian Manchester khaw club pahnih te English Football League Cup Last 16-ah an intawng dawn a, an inkhelhna tur hmun hi Old Trafford bawk niin inkhelh hun hi zan dar 12:30 a ni. EFL Cup hi semifinal chinah chiah double leg a nih avangin zanina inkhel tur erawh knockout a ni a, chak zawk an awm dawn avangin a hmuhnawm ang.

Chutihrualin kumtir lama an inhma-chhawn ṭum ang a ni tawh lo a, club pahnih hian hun harsa tak an tawng mek. City hian tun season match hmasa 10-a hnehna an chan hnuin inelna hnuhnung pangaah chak hmel an hmu tawh lo. United lam hi an ṭhenawm club aiin an la mualpho zawk, Pathianni zan khan Stamford Bridge-ah Chelsea lakah 0-4 in an mualpho.

Belgian midfielder tel loin

Manchester United midfielder Marouane Fellaini chu Blues an hneh loh ṭuma David Luiz-a'n a khupah a tlawh avangin a inlan thei dawn lo a, Belgian midfielder aiah veteran midfielder Michael Carrick a inlan beisei a ni.

Manchester City midfielder Kevin de Bruyne chu Southampton nen 1-1 a an inhnehtawk ṭumin half time-ah chawn hliam vanga lakchhuah a ni a, Belgian midfielder hi derby-ah a inlan thei lo ang. De Bruyne hian Old Trafford-a United an hneh ṭumin goal ṭha bik a khung bakah Iheanacho goal luh theih nan a inrawlh thuk hle.

United ṭantute tan De Bruyne awm lo tur hi thu lawmawm a ni a, Fellaini awm lo tur pawh hi lungngaihna tur niin a lang lo. Belgian midfielder inhliam vanga tuar zawk chu City an nih ngei a rinawm.

Pep Vs Mou

Pep Guardiola leh Jose Mourinho te hi vawi 17 an lo inhmachhawn tawh a, Spanish manager hian vawi riat hnehna changin Portuguese manager hi vawi thum chiah a chan ṭha zawkah a ṭang a, vawi ruk dangah erawh chungnung zawk an awm lo.

Old Trafford-a an intawn hmasak ṭumin Henrikh Mkhitaryan leh Jesse Lingard te chuan United tana bul ṭanin an mualpho a, Jose Mourinho-a'n minute 20-na lekah lakchhuah duh mah se player hmalam hun a ngaih vang chauha a lakchhuah loh thu a sawi.

Portuguese manager hian zanin hian hei bakah hian thutlukna lian tak siam tur a nei a, Paul Pogba ṭhatna ber tur a hriatchhuah vat a ṭul. Khawvel player manto ber hi French midfielder hian khelmual chhungah a man phu tawkin a la khel lo. Mourinho tana harsatna belhchhah turin defender Eric Bailly chu khup hliam vangin chhawr theih a ni dawn lo.

Pep Guardiola-a'n Old Trafford-a hnehna a chan zawhah goalkeeper Claudio Bravo chu a khelṭha lo chungin uchuak takin a fak a, Chilean keeper hi Champions League-a Barcelona an hneh loh ṭumin a mualpho nawn.

City khelh dan hmang hi an khing-puiten an hrechiang chho zel a, hei hi tun hnaia an talbuai chhanah a ngaih theih. Pep-a'n Barcelona a hlawhtlinna Bayern Munich a chhawm thei lo a, English club-ah hian German club tana a hlawhtlinna ken tel a harsat leh dawn.

Pep-a hoten anmahni aia pressure pe thiam Barcelona hmaah tihsual an ngah a, tunah chuan Southampton pressure pawh an dawl zo lo. John Stones-a'n Saints an khelhpui ṭumin an khingpui Nathan Redmond a goal khung tur a siam sak.

Engtin zel?

United manager Jose Mourinho chuan, "Manchester United hian ka theihna zawng zawng ka hlan. Tuna kan result ṭha lo hi hreawm ka ti a, hun harsa aṭanga talchhuah theih dan chu theihtawp chhuaha training leh huaisen taka beih a ni," tiin result ṭha neih thuai a beisei thu a sawi.

City manager Pep Guardiola chuan, "Kan thil tawn mek hi kan pawm a ṭul a, hemi hmachhawn tur hian kan inlungrual em em bawk. Match nga chhunga hneh loh neih loh tawp chu eng emaw a thlen vang a ni. Tunah chuan hmasawn zawnga kan kal leh a ṭul tawh a ni," tiin hun harsa aṭanga talchhuah a duh thu a sawi.

London Derby

London Stadium-ah zanin dar 12:15 hian West Ham-in Chelsea an mikhual dawn bawk. Blues leh Hammers hian tun hmain buaina an lo nei tawh ṭhin a, Chelsea ṭantuten ticket 5,000 chuang an chan bawk avangin field chhung leh pawn boruak sang tura ngaih a ni.

Buaina pumpelh theih nan rua-hmanna hrang hrang siam a ni a, stadium pawna zu an zawrh ṭhin mai pawh zanin hi chuan zawrh khap a ni ang. Hammers leh Middlesbrough te Premier League-a an in draw ṭumin buaina a chhuak tawh bawk a, hemi ṭum hian mi pathum man an ni.

Field pawn lam boruak a san ang bawkin field chhunglam a hmuhnawm ang. Chelsea-in Antonio Conte kaih-hruaina hnuaiah Manchester United 4-0 in an sawp a, Arsenal an hneh loh hnuah match thum an chak tawh. United an hneh ṭuma thil mak awmchhun chu goal li lai an khung chung sia Diego Costa-a'n goal a khung lo kha a ni.

West Ham-in league lamah hma an sawn chho a, Southampton an hneh loh hnuah Middlesbrough draw-in Crystal Palace leh Sunderland 1-0 ve ve in an hneh tawh bawk. Amaherawhchu zanina an inkheh tur hi EFL Cup a ni a, league ang em a ngaih hlut ni lo mah se nomawi chawi a harsat tawh avangin tun hnaiah a hlutna a sang thar hle.