Aizawl FC-in Chhinga Veng an tlan san

I League club Aizawl FC-in Ricky Lallawmawma goal hmangin Chhinga Veng FC 1-0 in an hneh a, K. Malsawmkima hote hian point 13 hmuin Mizoram Premier League kaithar nena an inthlauhna chu point riat a tling ta.

Chhinga Veng FC-in coach thar Chawngthansanga hnuaiah match li khel tawhin point an la hmu lo a, nimin tlai inkhel pawimawh taka Aizawl FC an hneh loh bawk avangin table mawngphaha awm thei dinhmunah an ding.

MPL kaithar hian point nga an hmu tawh a, nizan lama table mawngphaha awm Dinthar FC (4 points) leh Bethlehem Vengthlang FC inkhel result-in an hmalam hun a hril ang.

Khelh dan hmang

Aizawl FC coach Mala'n rin-lawk ang ngeiin defender ṭha pali Lallawmzuala, Lalrinzuala Khiangte, Lalramchullova Pautu leh Ricky Lallawmawma te chu tlarhnungah a rawn rem a, goalkeeper Lalawmpuia a la inhliam avangin Zothanmawia'n inkhel bul a la ṭan zel bawk.

Nigerian midfielder Benjamin Onome chu bench-ah a awm tluan a, Ghanaian forward Bright Middleton Mends kawppui chu rawlthar F. Lalremsanga a ni.

Chhinga Veng FC-in goal-keeper Isaac Vanlalpeka an lalut a, Kolasib tlangval hian inhliam vanga harsatna a neih avangin R. Lalhmangaihzuala'n inkhel bul a ṭan. Nigerian defender Emmanuel Chigozie chu tlarhnungah a club hmachhawn turin a ding a, left back Lalramfelpuia khelh theih loh vangin winger Lalthlamuana'n a ai a awh. Tlarhma lamah inhliam vangin an player langsar MS Dawngliana chu chhawr a ni lo a, MPL best forward leh top scorer ni tawh Dawngtea hi squad-ah dah a ni lo.

AFC innghahna tlarhnung

Aizawl FC-in bul an ṭan ṭha zawk a, defender thar Lawma cross ball ṭha tak chu forward Bright Middleton Mends-a'n goal-ah chantir thei lo. I League club-in ball an chang tam fal a, left back Ricky cross chu Bright-a'n a tauh fuh tawk loh vangin crossbar a per a, Ghanaian forward hi goal hmaah a hriam tawk lo.

Chhinga Vengin awmze neiin goal venghim thei lo mah se Aizawl FC goal nawrin awmzia a nei bik lo. First half tawp hma hretin player ṭha danglamna a lang a, captain Rohmingthanga ball fing chu Ricky-a'n um lutin Aizawl FC left back hian cool takin goal kilah tak a pet lut.

Second half-ah Aizawl FC bawk-in goal chance ṭha an nei hmasa a, Rohminga thawhrah chu Albert Zohmingmawia'n a seng thei lo a, Kawnpui tlangval hian goal zawnah a pet lo. Chhinga Veng-in inkhela chance ṭha ber an nei zui a, H. Lalmuankima'n AFC de-fen-der Ricky-a paltlang mah se Bawng-kawn tlangval ball pass ṭha tak chu Lalramliana Varte-in a pet pial.

Si phur zawk Chhinga Vengin an nawr a, counter attack hmanga chhu let Aizawl FC-in chance erawh an ngah zawk.

Substitute Zoramthara goal khung tur chu Chhinga Veng keeper R. Lalhmangaihzuala'n ṭha takin a dang a, Phase 1 lama mualpho tawh Lengpui tlangval Lalhmaa a khelṭha hle. Aizawl FC-in goal khat bak an khung theih loh avangin hun tawp lamah an talbuai deuh a, amaherawhchu goal khat lek khungin chiang takin an chak.

Eng nge an sawi?

Chhinga Veng FC coach Chawng-thansanga chuan, "First half-ah khel ṭha lo mah ila second half-ah kha chuan kan che ṭha a ni. Match li chhung kan chak theih loh avangin kan supporter-te hmaah pawh a zahthlak zozai tawh a ni. Chutihrualin kan vanduai vanga point hmu loah kan inngai a, point khat tal kan phu chuan ka hria. Theihtawp kan chhuah ang a, semifinal thlen ngei kan la tum," tiin a sawi.

Aizawl FC coach K. Malsawm-kima chuan, "Kan duh ber point thum kan hlawh chhuak a, Chhinga Veng hi club ṭha tak an nih bawk avangin kan chak hi a lawmawm a ni. Chutihrualin tlarhma lam erawh kan insiamṭhat a
ṭul a, goal khung hi hmasawn kan ngaihna lai a ni," tiin a sawi.