Messi leh Ronaldo tluk loh Griezmann

Thawhṭanni khan La Liga 2015-16 award sem a ni a, Valencia khawpuia award semna inkhawmah hian Atletico Madrid forward Antoine Griezmann chu La Liga Player of the year chawimawina pek niin French forward hian award semnaah hian a hmel a lan thei lo thung. 2008 - 09 season tawpa La Liga award sem a nih hnuah Best Player chawimawina hi Lionel Messi (6) leh Cristiano Ronaldo (1) lo chuan an la dawng ngai lo a, tun hi a vawi khatna a ni.

Kum 25-a upa Griezmann hian season hman zawh takah khan league match 38 khelin goal 22 a khung. La Liga Award sem zan hi Atletico tan chuan zan chhinchhiah tlak a ni. Griezmann bakah hian Diego Simeone chuan Best Coach chawimawina a dawng a, Jan Oblak chu Best Goalkeeper-ah thlan niin captain Diego Godin chu Best Defender-ah thlan a ni thung. Real Madrid a-
ṭangin Luka Modric chu Best Midfielder chawimawina pek a ni a, Barcelona forward Lionel Messi chu Best Forward-ah thlan a ni. European Golden Shoe dawng hlim Luis Suarez-a'n a phu ang tawk chawimawina dawng lo mah se Europe chhuak player ni lo zinga player ṭha berah thlan niin ‘La Liga World Player’ chawimawina a hum haw ta tho.