FA Cup chhuah man a to

Football Association chuan Britain ram pawn lama FA Cup television lama chhuah chhawn phalna chu kum ruk chhung atan an hralh a, an hralhna man zat hi tarlan ni chiah lo mah se pound maktaduai 820 bawr vel ni tura ngaih niin inremna hi 2018-19 season aṭanga in
ṭan tur a ni ang.

Marketing agency Pitch International chuan Europe khawthlang lam, Middle East leh Africa khawmualpui hmar lam ramah FA Cup chhuah phalna hi an lei a, khawvel hmun dang zawng erawh IMG-in an tuam thung ang. Britain ram bika chhuah phalna erawh BBC leh BT Sport chuan kum 2021 thleng chhuah phalna an nei mek a ni.

FA chief executive Martin Glenn chuan an inremna chu FA tan hlawkna ropui leh pawimawh tak a nih thu a sawi a, an sum dawn chuan khelmual leh hmunhma siam-
ṭhat kawngah nasa taka a puih tur thu a sawi. Glen chuan, "Tuna kan inremna hian nasa takin kan ram pumpuia football ṭanna kawngah min pui dawn a, kan mamawh ang thil tam tak kan bawhzui theih phah dawn a ni," a ti.

English football hotu-pa Glenn chuan sawi chhun-zawmin, "Kan inremnain chiang taka a pholan bawk chu khawvel huap pawha Emirates FA Cup larna hi a ni. FA cup hian sulhnu leh thawnthu ropui tak tak a lo nei tawh ṭhin a, tun hi fan-te phurna leh hlimna peka chhinchhiah reng tlak sulhnu hnutchhiahna remchang a ni a, player leh club te pawhin thil theih loh tak tak a awm lo tih hi an hriat phah dawn a ni," tiin a phur hle.

FA hian tun hnaiah agency leh broadcaster te tan ram huam bik leh khawvel huap ang pawha FA Cup chhuah phalna lei theih dan a duang a, he thutlukna avang hian Pitch International leh IMG te pawh hi FA nen hian inrem thei an ni. Tuna an inremna hian FA Cup mai piah lamah FA Community Shield leh FA Youth Cup chhuah phalna pawh a keng tel.