Chona hmachhawn nuam titu Wilshere

Jack Wilshere chuan club lian tan chauha khelh reng ai chuan chona hautak leh khirhkhan zawk hmachhawn tura club te zawka ngaih tana khelh chu nuam a tih thu a sawi chhuak.

Kum 24-a upa Wilshere hi hliamin a ti buai ngun hle a, a khelh chhunah beisei a phak lo bawk. Arsenal manager Arsene Wenger-a'n nipui transfer lai khan loan hmanga a chhuah a phal sak a, intuaihriam turin Bournemouth a zawm.

England inetrantional hian kartawp Premier League-a Tottenham nen goal awm loa an in-hneh-tawk ṭum khan inkhel bul a ṭan a, kum 2014 hnua a vawi khat nan khelmual chhungah minute 90 chhung hun a hmang.

Arsenal tana match 159 khel tawh Wilshere chuan, "Kum hnih chhung zet league-ah minute 90 chhung ka inkhel lo a, a rei duh vang vang hle. Training-na lamah thawkrim viau mah ila khelmual chhunga inlan tam loh chuan match fitness neih a harsa a, tunah chuan tun hma lam ang khan ka khelh chhuah leh theih tawh ka beisei," tiin a sawi.

Wilshere chuan sawi chhunzawmin, "Club lian tana khelh a, rilru hah lo leh chak inring sa a inkhelh chu a nuam. Mahse, hei hi a ṭha ber bik lo, dinhmun harsa tak aṭanga hnehna chang tura beih hian rilru leh taksaah paukhauhna a siam thei. Eddie Howe-a'n min ringtawk a, min rin ang ngeia khelh chhuah zel pawh ka tum," tiin a sawi.