UCL chawi turin kan la ṭha tawk lo - Lahm

Philipp Lahm chuan Champions League nomawi chawi thei tur chuan tun dinhmuna German champion Bayern Munich khelh dan chu a la tawk zawh loh thu a sawi.

Bayern Munich hi Pep Guardiola kaihhruaina hnuaiah season thum chhung chu Champions League semifinal aṭanga pet chhuah an ni a, Italian manager Carlo Ancelotti kaihhruaina hnuia an group match hmasa berah nikuma an ngam loh Atletico Madrid an ngam lo leh bawk. Hemi hnu hian PSV Eindhoven an hneh leh tawh thung.

Germany international hlui Lahm chuan, "Kartawp inkhelah khan kan thil tum pakhat chu kan ti hlawhtling ta, chu chu goal chhuuah loh kha a ni," tiiin Monchengladbach 2-0 a an hnehna inkhel chungchang a sawi.

Lahm chuan Europe lam sawi chhunzawmin, "Europe-a kan match hmasa berah khan beisei kan phak lo a, team ṭha ber ni tur chuan hmabak kan la ngah hle tih a chiang. Kan goal nawr a na nachungin kan inveng ṭha tawk lo ṭhin. Champions League nomawi chawi thei tur chuan tlarhma ber aṭanga a hnung ber thleng hian kan intluktlan a pawimawh," tiin a sawi.

Bayern hian a zawna Bundesliga nomawi vawi nga chawi thei turin kawng dik an zawh mek a, league match riat khelh tawh aṭanga point 20 hmuin hmahruaitu an ni. Kartawp hian league match khel turin FC Augsburg an tlawh ang a, karlehah Champions League group match khel turin PSV Eindhoven an zin chilh bawk ang.