Kerala-in Goa an lehthal

Thawhṭanni zan Indian Super League inkhelah FC Goa chuan Kerala Blasters an mikhual a, he inkhelah hian mualneitu FC Goa-in goal khung hmasa mah se Kerala Blasters-in second half-ah goal hnihin an chhanglet a, an mualah Zico enkawl Goa an mualpho.

Fatorda Stadium-a inkhel entu mi 18,000 hmaah mualneitu Goa-in goal an khung hma a, minute 24-na lekah Brazilian striker Julio Cesar chuan goal hmahruai a khung. Mahse, chawlhlawk hman a nih hnuah Blasters-in harhtharna an chang a, Mohammed Rafi hmanga an si phurh an sut hnuah Haiti international Kervens Belfort chuan an goal hnihna a khung leh a, Goa-in an chhanglet thei tawh lo.

FC Goa coach Zico chuan, "Fan-te beisei ang result kan neih theih loh avangin ngaihdam ka dil duh a ni. Mahse, kan hmabakah match engemaw zat khelh tur kan la nei a, hnual mai tur erawh kan la ni lo. Season hmasaa FC Goa team leh tuna mi khaikhin ka duh lo a, kan inthlak danglam nasat avangin ISL ṭantir aṭangin kan talbuai a ni," tiin season hmasaa final lut FC Goa leh tuna a enkawl team chu an danglam thu a sawi.

Mimal Lawmman

Emerging Player of the Match Keenan Almeida, FC Goa

Hero of the Match Kervens Belfort, Kerala Blasters

*Zanin ISL-ah inkhel a awm lo ang

Team Dinhmun

Team Pld W D L GF GA GD Pts

NorthEast United 6 3 1 2 5 3 2 10

Atlético de Ko… 5 2 3 0 6 4 2 9

Kerala Blasters 6 2 2 2 4 4 0 8

Chennaiyin 5 2 2 1 7 6 1 8

Mumbai City 6 2 2 2 6 6 0 8

Delhi Dynamos 5 1 3 1 7 6 1 6

Pune City 5 1 2 2 4 5 -1 5

Goa 6 1 1 4 4 9 -5 4