Ballon d'Or Messi leh Ronaldo bawk an langsar
Khawvela footballer ṭha ber thlanna Ballon d'Or 2016 chawimawina dawng thei tur hming 30 chu Thawhṭannni khan chhawpchhuah a ni a, ṭum dang ang bawkin Barcelona thiampuipa Lionel Messi leh Real Madrid forward Cristiano Ronaldo te chu hming langsar an ni.
MSN tia khawvelin a hriat lar te an lang kim vek a, Messi bakah hian Luis Suarez leh Neymar te chuan Argentina captain hnung an zui. BBC tia khawvelin a koh Karim Benzema, Gareth Bale leh Cristiano Ronaldo te zingah erawh French forward Benzema tan Ballon d'Or-ah hmun a awm ve lo. Ballon d'Or hi January 9, 2017-ah sem a ni ang.
Enge Ballon d'Or ?
Kum 1956 aṭang khan France rama football lam ziak ṭhin chanchinbu lar France Football chuan Ballon d'Or hi an sem ṭan a, hetihlai hi chuan Europe-a league hrang hranga khel player aṭanga kum khata che ṭha ber thlan nan hman ṭhin niin European Footballer of the Year tia hriatlar a ni bawk.
FIFA-in chawimawina hran FIFA World Player of the Year a kalpui ve reng bawk a, kum 2010 khan France Football nen hian inthurualin FIFA Ballon d'Or tih hmingchawiin khawvela footballer ṭha ber thlan nan hman ṭan a ni. Kum 2010 hnu lamah Messi-a'n vawi li a dawng a, Ronaldo-a'n vawi hnih a dawng thung.
Mahse, FIFA hian kum 1991 - 2009 inkara an lo kalpui tawh FIFA World Player of the Year chu a hrana kalpui leh an duh avangin France Football nena an thawhhona an titawp a, FIFA Ballon d'Or tih ṭhina FIFA hi a tel tawh lo ang. A thlangtu pawh journalist, national team captain leh coach ni ṭhin kha tunah chuan journalist chauh an ni tawh.
Premier League aṭangin
Season hmasaa Premier League champion Leicester City-in player pahnih an thawh a, striker Jamie Vardy leh PFA Player of the Year chawimawina lo dawng tawhtu Riyad Mahrez te chu khawvel footballer ṭha 30 zingah hian an hming a lang phak.
Premier League club dang
aṭangin Manchester United striker Zlatan Ibrahimovic, midfielder Paul Pogba, Manchester City player pahnih Kevin de Bruyne leh Sergio Aguero, West Ham midfielder Dimitri Payet leh Tottenham goalkeeper Hugo Lloris te an lang bawk.
United-in player pahnih thawh mah se inchhuanna tur chi a ni lo. Ibrahimovic hi season hmasaa Paris Saint Germain tan goal 50 zet a khung vanga lang a ni a, Pogba hi Juventus tan a chet ṭhat piahlama Euro 2016 final France nen an luh vanga lang a ni bawk.
Tu nge langsar?
Ballon d'Or chawimawina dawng tura hming lamrik ring ber chu Cristiano Ronaldo a ni. Kum 31-a upa Real Madrid forward hian season hman zawh takah khan Real tan inelna hrang hrangah match 48 khelin goal 51 a khung a, Champions League-ah Spanish club hi a champion pui bawk.
Ronaldo-a'n club-a hlawh-tlinna mai a duhtawk lo, Euro 2016-ah captain armband hreng chungin Portugal chu a champion pui a, he inelnaah hian goal thum chiah khung mah se Portugal tan khelmual chhung leh pawnah hruaitu ṭha a ni a, Euro nomawi an chawi theih nan player pawimawh a ni.
Ballon d'Or hnuhnung ber dawngtu Messi hi thai bo atan chuan a ṭha mah mah! Kum 29-a upa forward hian season hman zawh takah khan Barcelona tan inelna hrang hrangah match 49 chiah khelin goal 41 a khung a, tun season-ah pawh vawi 11 inlanin goal 14 a khung leh der tawh! Champions League-ah an nomawi humhim zo lo mah se La Liga leh Spanish Cup-ah an champion thung a, Copa America-ah Argentina chu final a hruai thleng bawk.
Ronaldo leh Messi chhaih buai pha tur an awm a nih chuan Luis Suarez a ni ngei ang. Liverpool striker hlui hian season hman zawh takah khan Barcelona tan inelna hrang hrangah match 53 khelin goal 59 a khung a, league match 35-ah goal 40 khungin Europe-a league hrang hrangah ani aia goal khung hnem an awm lo a, European Golden Shoe chawimawina pek a ni.
Player dang
Real Madrid chu Ballon d'Or dawng thei tur player 30 zinga thawh hnem ber niin player paruk an thawh a, Ronaldo leh Bale bakah midfielder Toni Kroos, Luka Modric, defender Pepe leh Sergio Ramos te hming a lang. Player pali ve ve thawhtu Barcelona leh Bayern Munich chuan Real hi an dawt a, Catalan club-in MSN bakah captain Andres Iniesta an thawh tel. Bayern Munich-in Robert Lewandowski, Thomas Muller, Manuel Neuer leh Arturo Vidal an thawh thung.
Juventus goalkeeper Gianluigi Buffon-a'n kum 38 zet tling tawh mah se khelmual chhungah a la upa lo tih pholang nawnin Ballon d'Or dawng thei tur zingah telh a ni a, Atletico Madrid forward Antoine Griezmann chu hming langsar zinga mi a ni bawk. Ballon d'Or dawng thei tur zingah striker an langsar a, season hmasaa Bayern tana goal 42 khungtu Robert Lewandowski, inelna hrang hranga goal 39 khungtu Borussia Dortmund striker Pierre-Emerick Aubameyang, Napoli tan Serie A goal 36 khunga record siamtu Gonzalo Higuain te hi dawng awm tak vek an ni.
Ballon d'Or dawng thei tur player 30
Sergio Aguero Manchester City
Pierre-Emerick Aubameyang Borussia Dortmund
Gareth Bale Real Madrid
Gianluigi Buffon Juventus
Cristiano Ronaldo Real Madrid
Kevin De Bruyne Manchester City
Paulo Dybala Juventus
Diego Godin Atletico Madrid
Antoine Griezmann Atletico Madrid
Gonzalo Higuain Juventus
Zlatan Ibrahimovic Manchester United
Andres Iniesta Barcelona
Koke Atletico Madrid
Toni Kroos Real Madrid
Robert Lewandowski Bayern Munich
Thomas Muller Bayern Munich
Luka Modric Real Madrid
Riyad Mahrez Leicester
Lionel Messi Barcelona
Hugo Lloris Tottenham
Dimitri Payet West Ham
Paul Pogba Manchester United
Manuel Neuer Bayern Munich
Pepe Real Madrid
Neymar Barcelona
Rui Patricio Sporting Lisbon
Sergio Ramos Real Madrid
Luis Suarez Barcelona
Jamie Vardy Leicester
Arturo Vidal Bayern Munich