Swiss-ah Nishikori a chak

Roger Federer leh Rafael Nadal ten kumin chhunga an inkhelh tawh loh tur thu sawi mah se ATP season a la tawp lo a, tournament pawimawh pathum khelh tur a la awm. Thawhṭan zan khan Swiss Indoors khelh ṭan a ni a - Kei Nishikori chuan a match hmasa berah 7-5, 6-1 in Dusan Lajovic a hneh.

Japan tlangval Nishikori hian kum 2011 khan he inelnaah hian final a lo lut tawh a, khawtual tlangval Federer lakah a tlawm. Kuminah bul a ṭan ṭha lehpek hle a, second round lut turin world number 77 lakah hian set hnuhnung zawkah game khat chiah a hloh.

Kum 26-a upa Nishikori chuan, "Tun hnai kum hnih chhung chu hliam vangin he hmunah hian ka inlan thei lo a, tunah ṭha taka ka inkhel ve leh thei ta hi ka lawm hle. Set hmasa zawkah hautak deuh mah se ṭha taka ka khelh chhunzawm avangin hnehna ka chang hram," tiin a sawi. Nishikori hi tun dinhmunah world number 5 a ni a, thla leha khelh tur ATP Tour Finals khel turin a tling chiang tawh.

Basel-a inkhel dangah seeded palina Marin Cilic chuan Mikhail Youzhny lakah 6-4, 6-2 in hnehna a chang a, Federico Delbonis pawhin Andrey Kuznetsov chu 6-4, 6-4 in a hneh ve bawk.

Kum 2012 leh 2013 champion Juan Martin del Potro pawh kum hnih a inlan loh hnuah kumin hian a rawn let leh dawn. Argentina tlangval hian kar hmasa a khelh zawh tak Stockholm Open nomawi chawiin ATP ranking-ah 42-na dinhmun a rawn luah leh tawh a ni.