MPL5 hmahruaitu Chanmari FC Referee vanga chak lo kan ni - Zo United coach

Thawhṭanni zan khan Chan-mari FC-in Malsawmfela penalty leh R. Malsawmtluanga goal hmangin Zo United 2-1 in an hneh a, Mizoram Premier League Season 5 hmahruaitu an ni. Nizan khan Round 7 thlenga hmahruaitu Bethelehem Vengthlang FC leh Dinthar FC an inkhel a, result a zirin table-a team dinhmun hi a danglam ang.

Chanmari FC goal hnihna MS-a'n a khung theihna atana siam saktu midfielder Lalrinchhana chu man of the match a thlan a ni a, injury time-ah Zo United tan Isak Vanlalpeka'n khung mah se result a ti danglam pha lo. Zo United boss Remlalthlamuanpuia (Sabito) chuan inkhelh banah an chak loh chhanah referee a puh a, Chanmari FC-in awm lo taka penalty an hmuh laia ani lamin penalty hmuh ngeina tura an hmuh ve loh chu a hriatthiam loh thu a sawi.

Coach thar kut hnu

Zo United-in Vanlalrova hnuaiah 4-2-3-1 formation an hmang a, Sabito hnuaiah 3-4-3 hmangin an player thlan dan a dang bawk. Champhai lama Dinthar hmachhawntu Zo United starting eleven aṭangin player panga ngawt thlak danglam a ni a, chung zingah chuan forward Mal-sawmdawnga chiah player thar a ni.

Season liam taa che ṭha Venghlui tlangval Isak Van-lalpeka'n hmun pawimawh a rawn chang let a, Bethlehem Veng-thlang nena sawi zawm player pahnihah H. Malsawmtluanga'n bul a ṭan laiin Laldinliana Varte erawh bench-ah ṭhuttir a ni. Coach thar Sabito-a'n inhliam vangin R. Lalthantluanga (Lalmama) a chhawr thei lo a, hei bak hi chu a duh ang thlapin player a remah a ngaih theih.

Chanmari FC-in midfield-ah an veng tlangval Rochhingpuia bul an ṭantir a, Sawmfela leh Lalruatfela Zote te an awm bawk avangin goal nawr na tur zawka ngaih an ni.

Goal thum

First half-ah goal a lut lo a, Chanmari defender C. Lalrosanga'n a pet kawh-na hmangin keeper LK Hmangaihzuala a tibuai a. Midfielder Chhinga 'chip ball' fing tak chu captain Lalrinchhana'n goal zawnah tauh mah se Zo United defender Lalnunpuia'n tauh per hmanin goal ban a per hnuah goal pawn lamah a per chhuak.

Zo United tlarhnung an inrem phui ṭha a, goal hmaa an chance hlauhawm ber chu player thar MS-a pet niin Farkawn tlangval ball pet kawh zet chu crossbar chungah chiah a kal. Minute 60-naah erawh Zo United defender Malsawma Chhangte-in Fela Zote ball a chhuhsakna lamah Republic Vengthlang tlangval a tih tluk avangin penalty a chawi. Malsawmfela rawn ding chhuakin chiang takin Chanmari goal hmahruai a khung.

Zo United lamin siphurh sut tumin Laldinliana Varte an luhtir a, Sihphir tlangval nung
ṭha mah se a tawp a zo fuh thei lo. Chutihrualin Dina Varte ball pet chuan chiang takin Chanmari defender MS Dawngzela kut a per a, penalty pek an ni lo. Zo United in goal khung an tum luat an tuar a, minute nga chiah a awm tawh tihin midfielder Rinchhana'n ṭha taka lalutin Electric Veng tlangval thawhrah hi subsitute MS-a'n a rah a seng.

Chak tur a chian tawh hnuah Dina Varte cross ball chu Zo United midfielder Isak-a'n goal-ah chantir mah se inkhel result thlak danglam pha turin a tlai hret tawh.

Referee sawiseltu leh faktu

Zo United coach Remlalthla-muanpuia (Sabito) chuan, "MPL game hi thianghlim tak, mawi tak, fair taka khelh ka duh avangin ka naute hnenah referee sawisel lo turin ka hrilh. Amaherawhchu Chanmari nena referee chet dan erawh sawisel loh theih loh a ni. Referee-in kan chak a hlau emaw ni tih mai tur a ni a, penalty kha awm lo takin a pe a nih chuan awm takin penalty kha min pe ve mai se la a dik tur a ni. Goal hnihna kha chu kan talbuai tawh hnu a ni a, penalty kha pe lo se chuan result a dang ang," tiin referee chungah a lungawi loh thu a sawi.

Referee thutluknaa lawm lo Zo United hian thuneihna kawltu chungah hian lawmna tur erawh an nei niin lang. Chanmari foward Malsawmfela'n freekick aṭangin a tauh lut a, referee-in goal-ah a pawm lo - replay en letin MPL2 champion goal hi pawm tur zawk a nih hmel!

Hetihlai hian Chanmari FC coach Lalsangzuala Hmar chuan, "Referee khan a ham ṭha lutuk. Fela an tih tluk kha penalty ni lo se eng nge ni ang? Sawi buai a ngai lo. A chiang lutuk. A chiang lutuk," tiin referee-in thutlukna dik a siam thu a sawi thung.

Chanmari boss hian fo-reigner chungchang zawhna chu sawi belh tur a hriat loh thu a sawi a, phase 1-a an draw tawh Zo United an hneh theih avanga a lawm thu inkhelh banah hian a sawi bawk.

Tute nge inlan?

Zo United FC (3-4-3) : LK Hmangaihzuala; Lalnunpuia Pachuau, Malsawma Chhangte, Hmingthanzauva; Vanlalhmangaiha, H. Malsawmtluanga (KC Lalruatkima 70'), Isak Vanlalpeka, Vanlalremsanga; Jesse Laldinpuia (Laldinliana Varte 62'), Lalnunsanga (Vanlalruata 86'), Malsawmdawnga.

Chanmari FC (4-3-3) : MS Dawngliana; MS Dawngzela, Lalrinchhana Tochhawng, C. Lalrosanga, Ramfangzuava; Rochhingpuia (R. Malsawmtluanga 73'), Lalruatfela Zote (Rosangliana 90'), Lalrinchhana; Lalrammawia (Lalmuanzova 55'), Malsawmfela, Vanlalbiaa Chhangte.