Point 86 a tawk ang - Wenger

Arsene Wenger chuan Premier League nomawi chawi tur chuan point 82-86 vel hmuh a tawk a rin thu a sawi a, Arsenal tan kumin hi champion tura kum ṭha a nih thu a sawi tel bawk.

Kum 67-a upa Wenger chuan, "Tun hnai kum nga liam ta vel ai kha chuan Premier League hi a hautak zawk a, keini pawh hi inelna hautak hmachhawn turin kan ṭha tawh zawk bawk. Ka hmuh dan chuan kum 2004 hnua nomawi la leh thei tura kan ṭhat ber ṭum a ni," tiin a sawi.

Arsenal hian league match kua khelh tawh aṭanga point 20 hmuin pahnihna an ni mek a, hmahruaitu Manchester City leh an hnuai chiaha awm Liverpool te nen an point hmuh a inzat vek.

Wenger chuan, "Kan khelh tawh china kan point hmuh aṭanga chhutin champion tur chuan point 82 aṭanga 86 bawr hmuh a ngai dawn niin a lang. Inpumpekna, thawhhona ṭha leh nomawi duha tuihalna nen hlawhtlinna hi chan theih a ni a, kan thil tum a hlawhtlin theih nan ka theihtawp ka chhuah ang - season tawp hma chu inelna hi a tawp ve dawn lo tih erawh kan hriat a pawimawh," a ti.

Season hmasa khan champion Leicester City-in point 81 an hmu a, pahnihna Arsenal nen hian point 10 in an phak lo. Kum hmasa lama beisei phak lo Manchester khaw club pahnih bakah Chelsea ten manager thar hnuaiah beisei an nei sang tawh a, German manager Jurgen Klopp kaihhruai Liverpool sawi hmaih theih an ni lo bawk - inelna a hautak tia a sawi hi a mak lo.

French manager chuan sawi chhun-zawmin, "Arsenal tana kum 20 chhung hna ka thawh tawhte hi a hlu ka ti. Ka hma hunah inrinsiakna a tam a, kan la ti fel lo bawk. Tuna pawimawh ber erawh ka nau ten eng tianga ṭhain nge an khelh zel theih ang tih leh nomawi kan chawi theih dan tur chauh a ni," a ti. Wenger hian tun season tawp thleng chiah Gunners tan contact a nei tawh a, FA lam chuan England team enkawl turin an awt hle tih an lo sawi lang tawh.

Premier League manager ṭanglai zinga mahni hna ngai thawk rei ber hian October leh November-ah inkhel hautak hmachhawn tur an ngah avangin an tan thla pawimawh bik a nih thu a sawi a, kum dang zawng aiin a naute chu inelna hautak hmachhawn tura an puitlin zawk thuin a thusawi tlang a kâwm bawk.