Spurs ngam loh Daniel Sturridge

"Rei lo teah hlimin kan lam ang

Sawta mite khan duh loin an hralh a

Sturridge, Sturridge

A ṭha tawk lo niin an sawi

Mahse hetah a lokal, kan lawm nan goal a

khung, hun ṭha vawi tam a mamawh lo

Daniel Sturridge

A goal khung lawmin lam a thai

na na na na na na na na na na na na...."

Daniel Sturridge-a'n Liverpool-a a season hmasa pahnihah kha chuan he hla hian sak a hlawh a, hliam vanga a buai hnuah erawh Reds fan-ten an sa khat ta. Tun season league match sarih zet a khelhah Sturridge-a lam hmuh tur a awm lo a, he hla ri hi hriat tur a awm lo bawk - goal a khung miau loh avangin.

Thawhlehni zan EFL Cup last 16-ah erawh England striker hian goal khung thiam a nihzia pholangin Liverpool tan goal hnih a khung a, Tottenham Hotspur lakah a team hi 2-1 a hnehna chanpuiin quarterfinal an lut - Reds in inelna hrang hrangah match kua chhung chu ngam loh an tawng ta lo.

Hei le Liverpool

Liverpool manager Jurgen Klopp-a'n West Brom laka chak hlim team aṭangin player 11 a thlak danglam a, tlarhmaah Sturridge leh Divock Origi te inkawpin an hmuhnawm hle. Reds-in goal khung turin minute 9 bak an mamawh lo a, kum 20-a upa Marko Grujic ball siamsak chu Sturridge-a'n harsatna nei loin a khung.

Reds an hlauhawm chhunzawm a, Stur­ridge leh Origi te goal shot ṭha tak chu Spurs keeper Michel Vorm-a'n a dang ṭha hle. Minute 64-naah erawh Dutch keeper hian a chet ṭhat a chhunzawm reng thei bik lo, Origi ball siamsak ṭha tak chu Sturridge-a'n Vorm chauh a hmachhawn hnuah chi ai loin a khung a, Anfield-ah Spurs an hawihai.

Kum 23 hnuai lam player pariat inkhel bul
ṭantirtu Mauricio Pochettino-a nauten Liverpool an ngam lo a, substitute Erik Lamela foul a nih hnuah penalty hmangin Vincent Janssen-a'n si khat sut ve mah se Sturridge bawk a hlauhawm chhunzawm a, English striker ball thiam hian hun tawp hnaih lamah crossbar a pet per a, tun season-a a vawi khat nana first team tana inlan Danny Ings chuan Vorm chauh a hmachhawn hnuah a pet goal thei lo bawk.

Manager thukhawchang

Liverpool manager Jurgen Klopp chuan, "Ka beisei ang ngeiin kan khel ṭha a, a pawi ber erawh kan goal chhuah kha keimahni tihsual vanga lut a ni kha a ni. A pumpuia thlir erawh chuan kan khel ṭha a, chak phu zawkin hnehna kan chang a ni," tiin a naute khelh dana a lawm thu a sawi.

Klopp chuan Sturridge fak nghalin, "Goal khung hi a talent dawn a ni a, a chakna a ni. Striker ṭha tak a ni tih chu kan hre vek a, goal a khung loh lai pawn Sturridge-a theihna leh thiamnaah inhnialna tur a awm lo," a ti.

Tottenham manager Mauricio Pochettino chuan, "Kan result-ah lawmna tur awm lo mah se kan khelh danah erawh ka lawm a ni. A tawp thlengin beiseina nei chungin kan khel a, kan tan chuan tawnhriat ropui tak a ni. Zanin kan inkhel hian kan hmabakah inrintawkna nasa tak min pe ang," tiin a sawi.

Laipui a puak

Arsenal-in an mikhual Reading lakah 2-0 in hnehna an chang a, Championship club laka an goal hnih hi Alex Oxlade-Chamberlain khung ve ve a ni. English midfielder hian minute 33-naah Reading keeper Ali Al-Habsi tihsual nangchingin goal hmahruai a khung a, minute 78-naah an goal hnihna a khung leh bawk - Gunners hian an match hnuhnung 14-ah chak loh an nei lo.

Arsenal manager Arsene Wenger chuan tun season-a match hnih chiah a la inkhelh tluan tir goal khungtu Chamberlain chungchang sawiin, "Alex hi goal hmaah a zam ṭhin a, zanina goal hnih a khung khan a hma hun atan inrintawkna nasa tak a pe ngei ang. Training naah a thawkrim a, a thawhrim rah chu zaninah khan khelmual chhungah kan hmu ta a ni," a ti.

Hull an chak

Premier League club Hull City chuan season hnih chhung a zawna EFL Cup quarterfinal an luhna ni turin Bristol City chu khualmualah 2-1 in an hneh a, defender Harry Maguire leh Michael Dawson ten goal an khung hnuah Championship club-in Lee Tomlin hmangin injury time-ah goal khat an sut a, second tlemte chauh a awm tawh tiha rawlthar striker Tammy Abraham-a goal shot line aṭanga pet chhuah hman a nih avangin Hull an vannei.

Bristol striker Abraham hi Championship club-ah hian loan-in a khel mek a, a club pangngai chu Chelsea a ni. Kum 19 leka upa striker hian Bristol tan inelna hrang hranga match 18 a khelh tawhah goal 11 a khung a, Blues boss Antonio Conte chuan English striker hi Chelsea hmalam huna an player pawimawh a la nih tur thu a sawi.

Goal khung thiam Magpies

Premier League aṭanga an tlak hnua insiamṭha mek Newcastle United chuan EFL Cup quarterfinal lut turin harsatna an tawk lo a, an mikhual Preston North End chu 6-0 in an sawp. Magpies tan striker Aleksandar Mitrovic-a'n minute 19-na leka goal hmahruai a khung hnuah Preston midfielder Alan Browne hnawhchhuah a ni a, Magpies-in tam zawk an nih an chhawr chhunzawm nghal.

St James' Park-a mipui 50,000 pung­khawm hmaah Serbian striker Mitrovic-a'n goal khat dang khung lehin Mohamed Diame chuan goal hnih a khung ve bawk a, Matt Ritchie chuan penalty aṭanga goal khat khungin Ayoze Perez chuan goal khat a thawh ve bawk - Rafael Benitez a enkawl team hian Championship table chung ber luahin hmahruaitu an ni mek bawk a ni.