Zaninah Ramhlun North-in Nigerian striker Francis an chhawp chhuak dawn. AFC hmaah Ramhlun North ṭha zawk. Point 16 - BVT vs West Warrior
Aizawl FC-in kumin I Day Football final-ah Ramhlun North FC vannei taka penalty shootout hmanga an hneh hnuin Mizoram Premier League Season 5-ah I League club hian 2-1 in MPL kaithar an hneh leh hram.
Zanin dar 7:00 hian Lam-mualah tun season-a a vawi thum nan Aizawl FC leh Ramhlun North an inkhel dawn a, Lalruat-liana Sailo-in (Tawia) MPL champion lai hmachhawn turin Nigerian striker Onyeama Francis Okechukinu a chhawr dawn.
Chennai Senior Division League-a goal riat khung thei leh top scorer goal khat chiaha pha lo striker Francis hian goal hmangin MPL kaithar lawmna thlen a tum ang.
AFC an nghing
Aizawl FC-in an coach K. Mal-sawmkima huaisenna an chhawm hnuah a khel ṭha zawk an nih loh hnuah pawh hnehna an chang chho zel a, tun season-a vawi li an chaknaa vawi thumah hian goal khat chauhin an chak. Hei chauh hi a ni lo, Aizawl FC hian MPL5-ah Chanmari , Bethlehem VT leh Chanmari West te an hneh loh bakah Dinthar FC an draw bawk.
Mizorama I League club awm chhun hi hneh theih an ni tih an result aṭangin a chiang a, Ramhlun North coach Tawia chuan, "Aizawl FC hi chu Aizawl FC an ni a, eng player pawh lalut se an khelh dan phung nghet takah ṭha takin an khel thei zel. Amaherawhchu AFC hi I Day Football-a an khelh dan aṭangin hneh theih an ni tih kan hria. Kan hneh ngei ngei ang chu kan ti lo a, hneh thei turin kan ṭhat dan berin kan inrem ang a, hneh ngei pawh kan tum ang," tiin chak tuma an inkhelh tur thu a sawi.
Aizawl FC hian inhliam vangin Lalramchullova an chhawr thei dawn lo a, Ramhlun North lamin Chennai club Hindustan Eagles FC aṭanga Nigerian Francis an lakluh ve chiah avangin inkhel tur hi a ngaihnawm sawt ang.
Ramhlun North manager K. Lalenghluna (Maenga) chuan, "Aizawl FC striker hlui Joel Sun-day leh tuna kan lakluh Francis ten agent an inṭawm a, agent hian Sunday aiin Francis hi kan tana
ṭha zawk turin a ngai. Kolkata-ah Nigerian striker la tur hian ka zuk zin a, striker ṭha tak nena ka rawn haw theih avangin kan hlawhtling thawkhatah ka ngai," tiin an player thar vangin a phur hle.
AFC an ni tlat
Aizawl FC-in foreign player pa-hnih midfielder Benjamin Onome leh forward Bright Middleton Mends an lalut a, a fuh zawk Ghanaian forward Mends pawhin MPL5-ah goal hnih chiah khungin Nigerian midfielder Benjamin erawh a khel tlak rih lo.
He ti chung hian Aizawl FC hian team ṭha zia an chhuah zel a, an tlarhnung chu an chhuan ber a ni. MPL5-ah AFC-in goal nga chiah la chhuahin tlarhnung phui ṭha ber an ni. Aizawl FC coach K. Malsawmkima chuan, "Tawia hi thil ti mai mai lo a ni a, uluk taka a enkawl hi chu an ṭha tur a ni. Chuvangin Ramhlun North hi khelh an harsa leh dawn a, point thum erawh kan hmuh ka beisei," tiin chungnung zawka a inngaih thu a sawi.
Hu Hu Hu
Ramhlun North-in ṭantu an nei ṭha ṭhin a, foreigner Francis bakah Shillong club Nangkiew Irat aṭangin full back Lalduhawma (Awmtea) an neih belh bawk avangin an phur sawt ang.
MPL kaithar boss Tawia chuan, "Mipui hi kan chakna hnar an ni a, min ṭawiawm ṭhat hi a ṭul a ni," tiin inkhel en turin Ramhlun North mipui a sawm.
Inkhel pawimawhah chuan Aizawl FC-in ṭantu an nei ṭha ziah bawk. Zanin inkhel result hian semfinal khel tur thui taka a hril dawn avangin zanin MPL hi a hmuhnawm khawp ang.
Bethlehem Vengthlang FC-in MPL5 match hmasa parukah point 16 an hmu a, Chanmari West FC-in point 16 hmu turin match riat an mamawh thung. Amaherawhchu BVT-in match hnuhnung pahnihah point an hmuh loh avangin West Warrior nen an point hmuh zat a inang chiah a, vawiin tlai dar 3:00-a chak zawk hi table-a a chung bera awm tur chu an ni.
Point khat dang!
BVT hian point 16 hmu tawh mah se an chetfuh loh a kaltluang a nih chuan point khat pawh hmuh belh a har dawn tih a chiang. Lalbiaksanga Colney hote hian a zawna vawi li chak tawh West Warrior an hneh hi phur tharna an chan leh theih nan a pawimawh.
BVT boss Lalbiaksanga Colney chuan, "Point thum hmuh kan tum, chak ngei ngei chu kan tum rualin goal kan khung thei lo a nih chuan khungtir bik kan tum lo. Point khat pawh hi result ṭha a ni a, chak loh erawh kan duh lo," tiin point hmuh ngei an tum thu a sawi.
Inkhel pawimawh
Chanmari West coach HC Zar-zoliana chuan, "Kan chak dawn em tih chu ka sawi thei lo a, chiang taka ka hriat erawh kan inkhel tur hian kan hma lam hun a hril tih hi a ni," tiin inkhel a pawimawh tih a hrechiang hle.
West Warrior hian an match hnuhnung berah Ramhlun North an hneh a, 3-2 a an chak chungin coach Zara a lawm lo.
Chanmari West boss chuan, "Kan match hnuhnung berah khan duh angin kan thothang a ṭha tawk lo. Tunah chuan game ṭha zawk khelh kan beisei a, Tuaitea pawh a khelh leh ngei lo beisei ru," tiin Mohun Bagan striker hlui PC Lalawmpuia inlan leh tur thu a sawi.
Chanmari West innghahna tak erawh captain Laldampuia a ni a, Kawrtethawveng tlangval hian goal ruk khung tawhin top scorer a ni mek. Lengpui tlangval Lal-muanzuala'n a thiamna a pho lang
ṭan tawh bawk a, MZ-a hi kum lamah naupang mah se field chhungah erawh a kawlhrawng sawt hle.