BVT hnehin Dinthar an tho ta
Dinthar FC-in MPL5-a Lammuala hneh loh la tawng lo Bethlehem Vengthlang FC 2-0 a hnehin table mawngphah an chhuahsan a, Ramhlun North leh Zo United point angin point sarih an hmu ta.
MPL1 champion Dinthar FC hian October 28, Zirtawpni zan hian MPL season hnihnaa nomawi chhuhsaktu Chan-mari FC an hmachhawn dawn. Maimawms lamin Lammual an ta neih leh ṭan tawh a, an foreigner pahnih Nigerian duo de-fender Balogun Hammed leh midfielder Clarence Carter ten tun hmaa an neih
ṭhin 'inrintawkna' an rawn ken tel bawk avang-in Chanmarians aiin Dinthar mipuiin Zirtawpni zan an nghakhlel zawk hial ang.
Michael leh Ruatpuia
Dinthar FC tan Nigerian duo an langsar a, team chakpuitu erawh Mizo tlangval Michael Lalremruata leh Lalruatpuia te an ni.
Ṭan aṭanga minute 9-na lekah corner aṭanga ball kal chu Dinthar defender VL Chhanhima'n tauhin forward Lalruatpuia'n a tihbuai avangin BVT goalkeeper Malsawmdawngzela'n a man nghet thei lo. Ball per hi Michael-a'n goal-ah pet lehnghalin BVT defender Hmingthanmawia'n dang hman mah se a per lehlam chu Ruatpuia'n a lu hmangin goal-ah a chantir.
Minute khat lek a kal a, goal hmahruai khungtu Ruatpuia'n BVT left back K. Lalmalsawma paltlangin Michael-a tan ball ṭha a siam a, Aizawl FC forward hlui hian a thiamna pholanna atan a hmang. Minute 11 chhung leka goal hnih khungtu Dinthar FC-in an bul ṭan ṭhat hmang ṭangkaiin harsatna nei loin hnehna an chang zui bawk.
Nigerian Duo
Defender Balogun Hammed-a'n a chakna a hmang thiam a, Dinthar tlarhnungah a inhrosa a ni ber a, Nigerian defender hi BVT tlarhmain an tibuai tam lo. Chanmari FC duo Malsawmfela leh Lalruatfela Zote a hmachhawn hunah chuan a thiam chin tak tak a hriat ang.
Inkhela hmuhnawm ber erawh Clarence Carter a ni a, Nigerian midfielder hian field laiah ro a rel. Assam XI tan pawha khel tawh Clarence hian awlsam takin ball a sem a, ball a ken rei loh avangin Dinthar game siamtu ber a ni. Nigerian midfielder pawh hi rang taka pressure pe ṭhin Chanmari midfielder hmaah fiahin a awm dawn.
Penalty Shout
Bethlehem Vengthlang FC-in transfer hun an la hmang ṭha tawk lo a, Lalnunmawia bak player lakluh an nei lo. Mawitea hian a club hlui Dinthar hmaah a thiamna lantir mah se goal a keng tel lo a, BVT-in an captain Laldingngheta inhliam an tuar bawk.
Hun tawp lamah BVT-in box chhunga Dinthar player handball vangin penalty shout an nei a, referee-in an beiseina a tih hlawhtlin sak lo. MPL5 ṭantirh hmasa paruk hneh loh tawng lo BVT-in match hnuhnung pahnihah point an hmu loh bakah goal ruk ngawt an chhuah avangin Lalbiaksanga Colney hoten insiamṭhat an mamawh hle.
BVT coach BS-a chuan, "A chak lo apiangin engatinge referee hi kan mawhpuh
ṭhin kan tih chuan referee hi an in enfiah ve a
ṭul a ni. Penalty ni awm tak min pek loh bak-ah an foreigner khan vawi nga lai foul nei chungin card pawh a hmu lo. Chutihrualin khel ṭha zawk Dinthar an chak a ni," tiin referee chunga a lungawi loh thu a sawi.
Lalhlu, i hmel a ṭha!
Dinthar FC coach Lalhlupuia Sailo chuan, "Kan club supporter 'The Maimawms' ten ṭha takin min rawn ṭawiawm a, anni lamin kan player-te an auh phur ṭhat avangin ka nauten an theihna zawng zawngin an khel thei a ni," tiin anmahni ṭantu mipui a fak.
Hetia Lalhlua'n an supporter-te a fak lai hian Maimawms chuan, "Lalhlu i hmel a ṭha, bus-ah i chuang dun ang, ti rawh le," tiin K. Kawla Stand aṭangin an rawn zai rual dual dual.
Dinthar pachal Lalhlupuia hi an veng club-in Chanmari West 0-4 a an hneh loh zawhah 'veng tan' tiin club chhiat vanglai takin a rawn zuang lut a, an veng mipuiin an phatsan lo. I League club Aizawl FC an hmachhawn ṭumin point hmu tura beisei ni lo mah se Dinthar mipui Lammualah an pungkhawm
ṭan a, point khat an hlawh chhuak.
Lalhlua hnuaia Dinthar FC match hnih-naah BVT 2-0 in an hneh lo a, tunah erawh phase 1-a an chak lohna zat ang chiaha hnehna changin phuba an la.
Dinthar FC-in an veng pa Lalhlua hnuaia match nga an khelhah point ruk an hlawh chhuak a, table mawngphaha awm Chhinga Veng rilru tihahtu an nih ang bawkin table sang chung bera awm Chanmari FC tan en liam theih an ni ta lo.
Tute nge inlan?
Dinthar FC (4-3-3) : Joseph Lalruatfela; Zothanzuala, Vanlalchhanhima, Balogun Hammed, Stephen Lalnunmawia; Saihmingthanga, Lalbiaknia, Clarence Carter; Sandip Alay (Samuel Laltlanthanga 83'), Michael Lalremruata, Lalruatpuia.
Bethlehem VT (4-2-3-1) : Malsawmdawngzela; K. Lalmalsawma, Laldinpuia,
H. Lalhlimpuia, Hmingthanmawia; Lalrintluanga, Zosangkima; Lalnunmawia (Lalnghinglova 85'), Lalrammuanpuia, R. Lalrinsanga (Lalmawizuala 74'); PC Laldinpuia
ZoFooty Statistics
Dinthar FC 2-0 Bethlehem Vengthlang FC
DFC : Lalruatpuia 9'; Michael Lalremruata 11'
MoM: Michael Lalremruata, Dinthar FC
50% Ball Possession 50%
14 Shots 10
4 On Target 5
2 Yellow Cards 2
0 Red Cards 0
Powered By Rainbow Multibrand
Mobile Showroom