FIFA-in Spanish FA a hrem

Football khawvela thuneitu sang ber FIFA chuan Spanish Football Federation chu an enkawlna hnuaia club Real Madrid leh Atletico Madrid-in dan kalha kum naupang zawk player an lakluh avangin £180,940 chawi turin an ti.

Real leh Atletico hi an player lak dan dik lo avangin transfer bazar vawi hnihah player lalut thei lo turin FIFA chuan a lo hrem tawh a, Spanish club pahnih hian an thubuai hi ngaihtuah nawn turin FIFA hnenah thlen mah se an dilna hi pawm a ni lo. Club pahnih hi Court of Arbitration for Sport-ah an zualko leh mek.

FIFA chuan Spanish FA hi an transfer kalpui dan siam ṭha a, ruahmanna thar siam turin thla ruk chhung hun an pe a ni. FIFA hian player kum 18 hnuai lam tan ram pawn club-a an khelh dan chungchangah dan khauh tak an nei a, hei hi player naupang zawkte him nana tih a ni.

Atletico hi kum 2007-2014 in-kara player naupang an lakluh danah chhui an ni a, Real hi kum 2005 - 2014 inkara player an lakluh danah chhui an ni thung. Club pahnih hremna hi kaltlangpui a nih chuan January 2018 thlengin Atletico leh Real Madrid hian player thar an lalut thei lo ang.