Brazil legend Carlos Alberto a thi

Kum 1970 World Cup-a Brazil an champion ṭuma captain Carlos Alberto Torres chu nimin khan lung-phu chawlin Rio de Janeiro khawpuiah a thi a, kum 72-a upa a ni.

Right-back Alberto hian kum 1970 World Cup final-a Italy nen an inhmachhawn ṭumin goal ropui a khung a, he goal luh nana Brazil team ball inpe kual vel chu hmuhnawm tak a ni - tun thleng hian World Cup goal ropui sawi a nih apiangin sawi hmaih a ni ngai lo.

Alberto captain-na hnuaia Brazil-in 1970 World Cup nomawi an chawi ṭum khan he team-ah hian player ropui Pele, Jairzinho, Tostao leh Rivelino te an tel a, World Cup-a inlan tawh team-ah chuan ṭha ber ang hiala sawi an ni ṭhin.

Brazil tan vawi 53 inlana goal riat khungtu Alberto hian player a nih laiin Europe lamah a inlan miah lo a, Brazilian club ṭha Flamengo, Fluminense leh Santos-ah a hun tam zawk hmangin Santos tan phei chuan match 400 chuang a khelhsak a, champion theihnaah a chmpion kim vek.

Alberto hian kum 1977-a Fla-mengo a chhuahsan hnuah North America lam panin a hunlaia team langsar New York Cosmos a zawm a, Germany legend Franz Beckenbauer leh Pele te nen USA club tan hian khel hoin kum 1982 khan he club-ah hian inkhelh a chawlhsan.

Kum 1998-a World Team of the 20th Century thlan a nih ṭuma lang phak Alberto hi kum 2004-a FIFA-in player la damlai zinga ropui bik 100 a thlan zingah pawh khan a tel a, inkhelh a chawlhsan hnuah pawh football hnuchhawn mai loa coaching lamah inhmang chhunzawmin club 13 bakah Oman leh Azerbaijan a enkawl a, kum 2005 khan coaching pawh hi a chawlhsan leh ta a ni.