NBA James leh Cavs an hrang nghal
Nimin zing khan NBA season thar chu khelh ṭan a ni leh ta a, champion lai Cleveland Cavaliers chuan an match hmasa berah New York Knicks chu 117-88 in an hneh. Cavs tan LeBron James chuan triple-double neiin 19 point, 14 assist leh 11 rebound a nei nghal. Hetihlai hian Stephen Curry khelhna Golden State War-riors erawh an chak lo nghal thung.
Quicken Loans Arena-ah inkhel ṭan tirh aṭanga a tawp thlengin Cleveland an chungnung tluan zak, quarter hmasa berah 28-18 a hmahruai nghalin a quarter hnuhnung ber thlengin a hniam zawkah an ṭang miah lo. Season hmasa an champion theih nana player pawimawh James bakah hian Kyrie Irving a langsar bawk. American point guard hian point 29 a score a, heng zinga 19 zet chu hun pawimawha ngaih quarter thumnaa a score a ni nghe nghe.
Season hmasa khan Cavs hian NBA Final-ah Golden State chu 4-3 in an hneh, he inelnaah hian 3-1 a hnufual tawh hnu hnehna chang let leh thei hmasa ber an ni hial. Cleveland-in kum 52 chhung zet an lo nghah tawh major sporting title an lak theih nana player pawimawh bera chhal ngam chu NBA Final Most Valuable Player LeBron James a ni.
MVP vawi li ni tawh James hian August thla khan Cavs tan hian contract thar a lo pawm leh tawh a, kum thum chhungin pound maktaduai 77.2 a hlawh ang - NBA player zingah ani ai hlawh sang an awm dawn lo tihna a ni ang. Season ṭan dawn khan James hian an rilru put hmang a la danglam loh thu leh an tum ber chu nomawi chawi leh a nih thu a lo sawi tawh a, hnehna an chan hnuah an bul-
ṭan dan chuan a tih lawm thu a sawi chhuak leh bawk.
Kum 31-a upa James chuan, "Kan khaw mipuite tan a ni e, he hmunah hian kan dinhmun a ṭhat loh lai pawhin min ṭan turin an awm reng ṭhin. Fan-te tel lo chuan infiamna khawvelah chuan a thlensan theih loh tluk a ni, vawiin hi bul ṭanna duhawm tak a ni a, hlimnain a tawp kan khar leh theih ka beisei," tiin a sawi.
Warriors an tlawm
Kum 2015 champion Gol-den State Warriors-in beiseina sang tak nen season thar an thlir a, Kevin Durant an neih belh bawk avangin team ṭha ber tura ngaih an ni. Mahse, beisei angin thil a kal vek lo - nimin zinga an match hmasa berah San Antonio Spurs chu 129 - 100 in an hneh lo nghal.
Steve Kerr-a naute hian sea-son hmasa khan regular season-ah match 73 zet hnehna changin NBA legend Michael Jordan-a hun laia Chicago Bulls record lo siam tawh chu an khum hial - NBA Final-ah erawh Cavs hneh loin an nomawi an hloh thung.
Oracle Arena-a inkhelah Durant-a'n a club thar tana a match hmasa ber khelin point 27 a score bakah vawi 10 zet rebound a la nghal. American small forward hian double-doubles a neih nghal bakah Stephen Curry-a'n point 26 a thawh bawk. Mahse, player ṭha pahnihte hnathawh hi Spurs laka hnehna chan nan a tawk zo lo.
Golden State hian an match hnihna atan Inrinni zing dar 7:00-ah New Orleans Pelicans an hmachhawn leh ang a, zing dar 4:30-ah Cleveland Cavaliers leh Toronto Raptors te an inhma-chhawn hmasa thung ang.