Pep-a'n Toure a nghak

Manchester City ma-nager Pep Guardiola chuan midfielder Yaya Toure chu khelmual chhunga inlan leh turin a duh a, chutih rualin Toure agent Dimitri Seluk-a ngaihdam dilna a nghah thu a sawi thung.

Kum 33-a upa Toure hian tun season-ah match khat chiah a la khel, Cham-pions League playoff second leg-a an chak tih a chian tawh hnuah khelh tir ve a ni. Group stage chinah erawh squad-ah pawh telh a ni tawh lo - Barcelona lama a duh loh hnu hi City-ah pawh a chhawr ṭha duh chuang lo.

Guardiola-a'n a player a enkawl danah Toure agent Dimitri Seluk a lawm lo a, Spanish manager hian Ivory Coast international Toure chu a ti duhdah ti hialin a sawisel. September thla khan Pep hian Seluk chu a thusawiah ngaihdam dil turin a lo ti tawh a, ngaihdam a dil lo a nih chuan Toure chu first team-ah a chhawr tawh loh tur thu a sawi hial.

Seluk a duai bik lo, "Eng nge ngaihdam ka dil a ṭulna? A ṭul a nih chuan Yaya a be mai tur a ni, chu chu a hna a ni," tiin a chhanglet ve bawk. Tun thlengin mi luhlul pahnih hian an thusawi an la hnuk kir duh lo ve ve a, a tuartu chu Toure niin inkhel thei loin a awm mek.

Guardiola chuan zawh-na chhangin, "Min ring rawh u, a nihna tak-ah chuan Yaya hi ka team-a lo kir turin ka duh, chutihrualin thil thlen dan chu min hriatthiam pui vek kha," tiin thusawi zuktu nih ai chuan ngaihdam dilna a phut thu a sawi.

Spanish manager chuan sawi chhunzawmin, "Barcelona leh Bayern Munich ka enkawl laiin Manchester United leh Arsenal hmachhawn turin England-ah hian ka lo zin tawh a, inkhelh a harsat zia ka hre tawh. Tunah hian ka inzir mek a, Premier League hautak zia ka hre chhuak zel," tiin a sawi bawk.

Kum 45-a upa Pep-a hnuaiah City hian season bul an ṭan ṭha hle a, inelna hrang hrangah a zawnin match 10 chhung zet hnehna an chang a, tun hnaiah erawh beisei an phak lo hle - an inkhelh hnuhnung pangah chak ni hmel an hmu miah lo.