Milan-in hun ṭha bawlhpelh

Italian champion vawi 18 ni tawh AC Milan chuan Serie A hmahruaitu nih theihna hun ṭha an neih an chhawrṭangkai zo lo a, an mikhualna ramah Genoa chuan 3-0 in an lo hneh.

Kartawp league match-a Juven-tus hneh hlim Milan hian inrintawkna sang tak nen Genoa hmachhawn mah se minute 11-na lekah Nikola Ninkovic-a'n goal hmahruai a khung a, second half ṭantirhah Milan defender Gabriel Paletta chu hnawhchhuah niin Juraj Kucka-a'n an lamah a tih luh bakah hun tawp hma chiahin Leonardo Pavoletti chuan an chak nemnghehna goal a khung leh bawk.

Milan hian league match 10 an khelh aṭangin point 19 an hmu a, hmahruaitu Juventus chu point hniha phak loin an chung chiaha awm AS Roma nen an point hmuh a inzat.

AC Milan coach Vincenzo Montella chuan, "Media lamin kan chungah boruak rit siam an tum nasa hle a, chuti chung chuan huaisen takin kan khel thei. Football-ah chuan duhthusam result a neih reng theih loh avangin lungawi kan zir a ṭul. Kan nihna hi match khat chauha teh tur a ni lo a, kan match hnuhnung 10 aṭang hian Milan nihna tak chu teh zawk tur a ni ang." tiin a sawi.