Thla hnih chawl tur Bailly

Manchester United defender Eric Bailly chu a khup hliam vangin thla hnih chhung vel a chawlh a ngai dawn a, a hma berah Krismas velah a lo kir dawn chauh tihna a ni.

Kum 22-a upa Bailly hi kartawp Premier League inkhelah Chelsea 4-0 a an hneh loh ṭumin Eden Hazard nen inti palhin a khupah hliam a tuar a, minute 52-naah thlak a ngai. Inkhelh banah Manchester United manager Jose Mourinho chuan hun rei tak a chawlh a ngaih a hlauhthawn thu a lo sawi chhuak tawh.

Ivory Coast defender chuan, "Ram leh club tan hian thla hnih emaw a aia rei loah ka lo kir theih ka beisei," tiin a hliam endik a nih hnuah a lo kir hun tur a sawi. A hliam vang hian inelna hrang hrangah match 12 vel a khel thei dawn lo tihna a ni.

Nipui transfer lai khan Bailly hian Spanish club Villarreal aṭangin pound maktaduai 30 velin United hi a zawm a, manager Mourinho hnuaiah player pawimawh niin a inhliam hma hi chuan United tan league match zawng zawngah a inlan kim vek bakah thlak a ni ngai lo.