Halep hnehtu Kerber dinhmun a ṭha

Angelique Kerber chuan Simona Halep lak-ah hnehna changin 2016 WTA Final khelh mek-ah semifinal lut turin a din-hmun a sawhnghet tawh hle.

Singapore-a inkhelah world number 1 Kerber hian darkar khat leh minute 22 chhungin Romanian nula Kerber hi 6-4, 6-2 in a hneh. German nula hian a match hmasa zawkah Dominika Cibulkova a lo hneh tawh bawk avangin group match khelh hma-bak pakhat a la neihah chak lo pawh nise midang result a zirin semifinal a lut thei tawh.

Red group inkhel dangah a match hmasa zawka Halep hneh lotu Madison Keys chuan Cibulkova lakah 6-1, 6-4 a hnehna changin a sang pali zinga inlan turin beiseina a la nei ve zel bawk.

Kum 28-a upa Ker-ber chuan, "Ka khel ṭha tluang, he hmunah hian tun hma lam aiin ka che fuh chho zawk. Singapore hi nuam ka ti a, match hnih ka khelh tawhah ka lungawi hle," a ti. Kerber hian chawlhkar 186 chhung zet world number 1 lo ni tawh Serena Williams pawtthlain WTA ranking-ah a chung ber dinhmun a luah mek.

WTA Final-ah hian world ranking-a sang pariat an inel a, group pahnihah
ṭhen niin an inkhelh kual hnuah a sang pahnih ve vein semifinal an lut dawn a ni. Red group-ah hian Kerber, Halep, Keys leh Cibulkova te an inela, group dangah champion lai Agnieszka Radwanska, Svetlana Kuznetsova, Karolina Pliskova leh Garbine Muguruza te an inel thung.