India dinhmun a him lo

Blue Tigers-in Igor Stimac ban a, coach atana Manolo Marquez an rawih hnuah beisei ang result an nei thei lo - match sarih an khelh tawhah vawi khat chiah an la chak!

India-in Igor Stimac an ban khan, coach langsar tak tak, khawvel huap pawha hmelhriat hlawhten Blue Tigers enkawl an dil hlawm. Mahse, AIFF-in Indian football hrechiangtu coach atan an duh a, Manolo an ruai.

Manolo hnuaiah beisei ang result erawh an hmu lo chiang hle. September 2024-ah Intercontinental Cup an khel a, Mauritius (0-0) an draw hnuah, Syria chu mahni buzawlah ngei 3-0 in an ngam lo.

Kum tawp lam international break-ah Vietnam leh Malaysia an hmachhawn a, 1-1 ve vein a tawp. March thla khan Manolo hnuaiah a vawi khat nan India an chak a, 3-0 ngawtin Maldives an sawp.

Mahse, a hnuah Asian Cup qualifier khelin, Shillong khawpuiah Bangladesh an hneh zo lo a, 0-0 in an ṭin.

AFC Asian Cup 2027 Qualifiers final round-ah hian group tina pakhatna ṭheuh chu Asian Cup khel tura tling tur an ni a, India hi group C-ah Hong Kong, Bangladesh leh Singapore te nen an awm ho.

India hian an match hmasa berah Bangladesh an inhnehtawkpui avangin point khat chauh an la nei a, Hong Kong laka an chak zawh leh loh chuan hmabak a ko tawh dawn - India tan insiamṭhat a ngai.