Silly Point : Champion leh pion loh

American poet hmingthang Emily Dickinson chuan, a poem lar tak "Success is counted sweetest"-ah chuan, chak leh hlawhtlinna hlutzia hre chiang ber chu, kil khata chak zo ve lo, lo ding kun rengte hi an ni a ti a nih kha. A va dik hmel si em.

TATA IPL 2025-na final hmuhnawm tak kan lo thlir zo ta a. Virat Kohli-a'n a cricket zinkawnga a nomawi hunna chhuara a la hun loh awmchhun IPL nomawi a hung ve thei dawn ta a. Punjab Kings erawh a ṭum hnihna atan tlang chhip an thlen hmain an irhfiak a, a pawi zo leh ta.

Champion ngai lo champion a na...

"RCB leh IPL nomawi hi an inhal," tih hi he kum 18 chhung hian cricket tuimite leh RCB ṭantute ngaihdan a ni hman tawh. Mahse tuk tin khawchhak lamah ni a lo chhuak a, tlai tin thlang lam pana inher liam reng ta na na na chu, RCB hun a lo inherchhuak ve ta.

Zep thu a awm lo, kumin IPL chhunga team zenghet nei leh sakhat ber an ni miau a, an champion ni a lo inherchhuak pawh hi thil mak a ni lo. A tawi zawngin T20 hi batsman-te infiamna a ngaih ni mah se, kumin IPL a bowling department nei ṭha ber chu RCB te an ni a, an champion-na thuruk pawh a ni.

Football lamah PSG-in an tum ram UEFA Champions League nomawi a ṭum khat nan an chawi a, Local football lamah Republic Veng Branch YMA leh Bethlehem Vengthlang Branch YMA ten final hmuhnawm tak min hlui a, tawpah Republic Veng an dingchang ta zawk. Infiamna khawvel kutpui a ni ber awm e.

...An champion a kha?

Chak dan tawk thiam te, chak loh dan tawk thiam te hi infiamna khawvelin min zirtir pawimawh ber zinga mi a ni a. UEFA Champions League lama PSG champion boruak chu, champion an lawmna lama nunna chan pahnih leh mi 100 chuangin hliam na tak an tawrh thu chuan a hliahkhuh ta daih mai.

IPL champion RCB lah an fans te champion lawm avanga sapatal avangin, Bengaluru khawpuiah mi 11-in nunna an chan a, tunah hian na tuar 'serious' tak tak 100 chuang fe an awm thu report hnuhnung ber a ni.

Champion nomawi chawi ngai lo ve ve an lo champion ve kher bawk nen, tinzawn tur a tam ta mai. Hringnun hi chu chhuk leh chho, mam leh bawl paltlang reng kan ni a, kumhlun a awm lo, chatuan daih a awm hek lo.

Chuta pawimawh ta ber chu: Tlang chhip kan thlenchhuah ni a lo inher pawha parh hluai loh (Tunlai ṭawng takin 'over' loh), khuarkhurum mawnga mawng sawh dawma kan tlak ṭum pawhin indawm kun ngawih ngawih chuan loh tur. Infiamna khawvelah phei chuan a ni leh zual awm e.

Sports Philosophy 1 chuan - "Humble in victory & Gracious in defeat" a tia lawm. Thil engpawh hi tawng i la, khawvel tawpna a ni lo e, tih kan hriat nawn fo hi a ṭha awm e.