ISL khelh hi hmanhmawh loh tur - Moosa

India Under 23 coach Naushad Moosa chuan player naupang zawkte chu Indian Super League-a khelh hmanhmawh loh turin a chah. Moosa hian season liam ta khan NorthEast United-ah Juan Pedro hnuaiah assistant coach hna a chelh.

Moosa chuan, "Kum 19 hnuai lam player te hian ISL club tana khelh an duh vek. Mahse, ka thurawn chu ISL khelh nghal loh hi a ni. ISL khelh tum chu a pawi lo a, tum pawh a ṭha. Chutihrualin inelna sang ber erawh mi tlemte tan chauh a ni. Player naupang zawkte chuan an khelh phakna tur club-a contract an ziah a ṭha ber. Club khelhna hausa viau mah se inkhelh miau loh chuan hmasawnna a awm thei lo," tiin a sawi.

India Under 23 team hian nakkuma neih tur Asian Games atan inpuahchahna an nei mek a, kumin September thla hian AFC Under 23 Asian Cup qualifier an khelh a ngai bawk. June 18, Nilaini hian Tajikistan nen friendly match an khel ang a, June 21, Inrinniah Kyrgyz Republic nen an inkhel leh bawk ang.

Tunah hian Kolkata-ah training an nei mek a, June 16 hian friendly match neihna tur Dushanbe an pan ang. Moosa hian player 29 a koh zingah Mizo tlangval pahnih Lalrinliana Hnamte (Chennaiyin) leh Lalremtluanga Fanai (Bengaluru FC) te a ko tel a ni.