Man United-in Mbeumo an dawr ṭan

Manchester United chuan nimin khan Bryan Mbeumo lak tumin a vawi khat nan Brentford an dawr a, Cameroon international forward mana an sum thehchhuah zat hi pound maktaduai 25 bakah a chet ṭhat dan a zira pound matkaduai 10 belh a ni.

Man United dawr hi tlem chhe lo mah se Bees beisei zat erawh a pha lo hle. Brentford hian Man United-in Wolverhampton Wanderers aṭanga Matheus Cunha an lakna man £62.5mtd zat vel an beisei.

Chutihrualin Ruben Amorim-a'n tlarhma tih chak nan Mbeumo a duh a, Cameroon international striker hian kum khat chiah contract a neih tawh avangin lak chhuah har lutuk lo tura naih a ni thung.

Kum 25 mi Mbeumo hian Old Trafford-a kal a duh a, mahse club pahnih an inrem a ṭul. Bees manager Thomas Frank chuan, "A man phu tawka rawn dawr an awm a ngai a, a man pawh a to dawn," tiin thla liam ta khan a sawi tawh a, tlawm taka chhuah tir chu an tum lo hle.

Mbeumo hian kum 2019 khan Troyes aṭangin Bees hi a zawm a, match 242 khel tawhin goal 70 a khung a, assist vawi 51 a nei bawk. Cameroon tan Mbeumo hian match 18 a khel tawh a, goal li a khung tawh.

Bees forward hi Amorim-a khelh duh dan nena inrem tura ngaih a ni a, season liam ta khan Mbeumo hian league-ah goal 20 khungin assist vawi riat a nei. Ivan Toney-a awm laiin Bees-in 4-3-3/4-2-3-1 an hmang ṭhin a, hetah ian ṭha takina khel thei. Hei bakah hian 3-5-2 an hman pawhin Yoane Wissa nena an inkawp pawhin a khel ṭha a, a hmasa bera dah tur pawhin a rintlak tihna a ni.

Mbeumo hi ke vei lama pet a ni a, chutihrualin ke dinglam pawh a hmang thei viau bawk. Amorim-a'n 3-4-3 a hmang a nih chuan attacking midfielder (no. 10) ding lama awm zawkah a ṭangkai thei ang. Man United-in Premier League-a sulhnu nei lo Rasmus Hojlund leh Joshua Zirkzee te lalutin an tisual a, Mbeumo erawh Premier League-a hming chher tawh a ni.